Cəmiyyət
Mərkəzi Bankın nəzarət səlahiyyətləri genişləndirilir
Azərbaycan Mərkəzi Bankının nəzarəti ayrı-ayrı maliyyə institutları ilə yanaşı, onların daxil olduğu maliyyə qruplarını da əhatə edəcək. Bununla bağlı qanunvericiliyə dəyişiklik layihəsi Milli Məclisin müzakirəsinə çıxarılacaq.
Crossmedia.az xəbər verir ki, məsələ Milli Məclisin oktyabrın 16-da keçiriləcək iclasında müzakirəyə çıxarılacaq “Azərbaycan Respublikasının Mərkəzi Bankı haqqında” qanuna təklif edilən dəyişikliklər layihəsində əksini tapıb.
Layihəyə əsasən, qanunun cinayət yolu ilə əldə edilmiş əmlakın leqallaşdırılmasının və terrorçuluğun maliyyələşdirilməsinin qarşısının alınmasını nəzərdə tutan 48-1-ci maddəsinin yeni redaksiyada verilməsi təklif olunur.
Dəyişikliklər Avropa Şurasının Pulların Leqallaşdırılmasına və Terrorçuluğun Maliyyələşdirilməsinə Qarşı Tədbirlərin Qiymətləndirilməsi üzrə Ekspertlər Komitəsinin (MONEYVAL) Azərbaycanın bu sahədəki sisteminin beşinci raund qiymətləndirilməsi üzrə hesabatında FATF-ın 26-cı və 27-ci tövsiyələri əsasında hazırlanıb.
Layihəyə görə, banklar, həyatın yığım sığortası ilə məşğul olan yerli və xarici sığortaçılar, təkrarsığortaçılar, sığorta vasitəçiləri, investisiya şirkətləri, investisiya fondları və onların idarəçiləri, eləcə də xarici investisiya fondlarının nümayəndəliklərinin daxil olduğu maliyyə qruplarına konsolidasiya edilmiş nəzarət həyata keçiriləcək. Bu, ayrı-ayrı maliyyə institutları ilə yanaşı, bütövlükdə maliyyə qrupunun fəaliyyətinin qiymətləndirilməsini nəzərdə tutur.
Maliyyə institutlarının və qruplarının cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsi sahəsində risk profilləri, o cümlədən qanunvericiliyin tələblərinə əməl edilməməsi riskləri mütəmadi qiymətləndiriləcək.
Maliyyə institutu yenidən təşkil olunduqda, benefisiar mülkiyyətçiləri dəyişdikdə, fəaliyyət növlərində, müştəri qruplarında və ya coğrafi fəaliyyət dairəsində dəyişiklik baş verdikdə risk profili yenidən nəzərdən keçiriləcək. Əvvəlki təqvim ili ilə müqayisədə əməliyyatların intensivliyi və ya həcmi 40 faiz və daha çox artdıqda da təkrar qiymətləndirmə aparılacaq.
Mərkəzi Bank nəzarət tədbirlərinin tezliyini və intensivliyini maliyyə institutunun və ya qrupunun risk profilini, siyasətini, daxili qaydalarını, nəzarət mexanizmlərini və prosedurlarını nəzərə almaqla müəyyən edəcək. Bu zaman ölkə səviyyəsində cinayət yolu ilə əldə edilmiş əmlakın leqallaşdırılması, terrorçuluğun maliyyələşdirilməsi, kütləvi qırğın silahlarının yayılması və bu fəaliyyətin maliyyələşdirilməsi ilə bağlı risklər də qiymətləndiriləcək.
Nəzarət tədbirlərinin müəyyənləşdirilməsində maliyyə institutlarının xüsusiyyətləri, müxtəlifliyi və sayı, eləcə də risk əsaslı yanaşma çərçivəsində onlara verilən səlahiyyətlərin həcmi nəzərə alınacaq.
Layihəyə əsasən, Mərkəzi Bank nəzarət tədbirlərini həyata keçirmək üçün maliyyə institutlarından və maliyyə qruplarından yazılı sorğu əsasında sənəd və məlumatlar tələb edə biləcək. Tələb olunan məlumatlar sorğuda göstərilən müddətdə təqdim edilməlidir.
Beləliklə, dəyişikliklərin maliyyə institutları və qrupları üzərində risk əsaslı nəzarəti gücləndirməsi, eləcə də Mərkəzi Bankın məlumat tələb etmək səlahiyyətlərini daha aydın müəyyənləşdirməsi nəzərdə tutulur.
19:48 13.10.2026
Oxunuş sayı: 54
