Deputat: Təxribatların qarşısında hamımız sipər olmalıyıq
Azərbaycanda vahid məktəbli geyimi ətrafında yaranan müzakirələr oktyabrın 12-də bir sıra təhsil müəssisələrinin qarşısında baş verən insidentlərlə daha da gərginləşib. Mediaya yayılan məlumatlarda məktəblərin qapı və pəncərələrinin sındırılması, Qaradağ rayonunda məktəb direktorunun avtomobilinin yandırılması və dini şüarların səsləndirilməsi barədə məlumatlar yer alıb. İctimai qaydanın pozulması ilə əlaqədar 37 nəfər məsuliyyətə cəlb edilib. Eyni zamanda, Medianın İnkişafı və Yayım Şurası məktəbli geyimi məsələsinin dini müstəviyə çəkilməsi, sosial şəbəkələrdə oxşar məzmunlu paylaşımların koordinasiyalı yayılması və süni ictimai gərginlik yaradılması cəhdləri barədə xəbərdarlıq edib. Bu hadisələr fonunda əsas məsələ dini inancları və dinc etiraz hüququnu qanunsuz hərəkətlərdən ayırmaq, təsdiqlənməmiş məlumatların yayılmasına yol verməmək və mümkün təxribatların cəmiyyətə təsirini düzgün qiymətləndirməkdir. Bəs insanlar dini həssaslıqlardan istifadə edən manipulyasiyaları necə tanımalı, özlərini bu cür təsirlərdən necə qorumalıdırlar və belə fəaliyyətlərin arxasında hansı ideoloji məqsədlər dayana bilər?
Milli Məclisin deputatı Ceyhun Məmmədov Crossmedia.az-a açıqlamasında vətəndaşları yayılan məlumatlara diqqətlə yanaşmağa, təxribatlara uymamağa və milli həmrəyliyi qorumağa çağırıb:
“Həqiqət odur ki, bu gün ölkəmizə qarşı ciddi bir informasiya müharibəsinin getdiyinin şahidiyik. Davamlı olaraq Azərbaycanla bağlı yanlış məlumatlar tirajlanır, Azərbaycanın daxili işlərinə kənardan çox ciddi müdaxilələr var. Bu müdaxilələrin əsas hədəfi və məqsədi vətəndaşlar üçün ciddi problemlərin yaradılması və proseslərin qarşıdurma səviyyəsinə qaldırılmasıdır. Biz qəti şəkildə buna imkan verməməliyik”.
Deputat qeyd edib ki, belə bir şəraitdə vətəndaşların məsuliyyətli davranması və təxribat xarakterli çağırışlara uymaması xüsusi əhəmiyyət daşıyır:
“İnsanlarımız çox məsuliyyətli və diqqətli olmalıdırlar, qəti şəkildə təxribatlara uymamalıdırlar. Çalışmalıdırlar ki, birliyimizi və həmrəyliyimizi qorusunlar. Bu addımların əsas hədəfi və məqsədi həm də bizim birliyimizi, həmrəyliyimizi pozmaqdır. Biz buna qəti şəkildə imkan verməməli və bu cəhdlərin qarşısında hamımız sipər olmalıyıq”.
Ceyhun Məmmədov hazırkı dövrdə dövlətin və dövlətçiliyin qorunmasının, eləcə də cəmiyyətdə həmrəyliyin saxlanmasının vacibliyini diqqətə çatdırıb:
“Hazırkı dövr çox mürəkkəb və çətin bir dövrdür. Bu dövrdə hamımız məsuliyyətli olmalıyıq. Qarşıdurmalarda, dövlətimizə qarşı təxribatlarda və dövlətimizə qarşı atılan addımlarda hər birimiz çox ehtiyatlı, qətiyyətli və prinsipial olmalı, dövləti və dövlətçiliyimizi qorumalıyıq”.
Nigar Xəlilli
16:30 13.10.2026
Oxunuş sayı: 239
