Gündəm
Avropa Parlamentində qalmaqallı çıxış: Azərbaycan haqqında mühazirə oxumağı DAYANDIRIN
Avropalı deputat Ancelin Füre parlamentdə “Azərbaycan Parlamentinin Avropa Parlamenti ilə əməkdaşlığı dayandırmaq qərarı” ilə bağlı keçirilən debat zamanı Avropa İttifaqının siyasətini sərt tənqid edib.
Crossmedia.az bu barədə xarici mediaya istinadən xəbər verir.
Deputat bildirib ki, Azərbaycanın Assambleyadan qeyri-rəsmi uzaqlaşması sadəcə prosedur addımı deyil, bu, Avropa İttifaqı üçün strateji nəticələr doğuran ciddi siqnaldır.
Onun sözlərinə görə, Avropa İttifaqı Ermənistanla münasibətlərə müdaxilə etməklə balanslı siyasət yürüdə bilməyib və nəticədə regionda etimad itkisi yaranıb.
Ancelin Füre qeyd edib ki, Avropa İttifaqı bir tərəfdən Azərbaycandan qaz tədarükünə zəmanət almağa çalışıb, digər tərəfdən isə ardıcıl siyasi qətnamələrlə Bakı ilə münasibətləri gərginləşdirib.
Deputat çıxışında ABŞ administrasiyasının “Sülh və beynəlxalq rifah naminə Tramp” təşəbbüsünü də nümunə göstərərək bildirib ki, Vaşinqton həm Azərbaycanın, həm də Ermənistanın maraqlarına cavab verən tranzit dəhlizi modelinin formalaşdırılmasına nail olub.
O vurğulayıb ki, Mərkəzi Asiyada yeni geosiyasi və geoiqtisadi reallıq formalaşır, lakin Avropa bu prosesdən kənarda qalır.
“Bu bəyanat diplomatiyasını və dünyaya mühazirə oxumağı dayandırın”, – deyə deputat Avropa Komissiyasının yanaşmasını tənqid edib.
Fürenin sözlərinə görə, diplomatiya Avropa Komissiyasının deyil, Avropa İttifaqına üzv dövlətlərin məsuliyyətində olmalıdır.
14:04 22.05.2026
Oxunuş sayı: 202
