Afaq Bəşirqızı Crossmedia.az-a açıqlama verdi: "Bütün bunlar sənətkar ömrünü uzadır, həvəsini artırır və yeni yaradıcılığa sövq edir"
Bu gün, Azərbaycanın teatr və kino aktrisası, Xalq artisti, "Şöhrət" və "Şərəf" ordeni laureate, Prezidentin fəxri təqaüdçüsü, Mədəniyyət və İncəsənət Universetinin professoru, Azərbaycan Dövlət Musiqili Teatrının aparıcı aktrisası Afaq Bəşirqızının 70 illik yubileyidir. Afaq Bəşirqızı aktrisa kimi fəaliyyətə 1973-cü ildən başlayıb. O, teatr yaradıcılığı ilə yanaşı bir sıra kino və televiziya tamaşalarında da çəkilib. Azərbaycan Televiziyasında hazırlanmış Anarın "Evləri köndələn yar" (Darçınbəyim), Vaqif Səmədoğlunun "Yaşıl eynəkli adam" (Zəhra), Əli Əmirlinin "Bala başa bəla" (Suğra), Məcnun Vahidovun "Yarımştat" (Ayna), Aqşin Babayevin "Nekroloq" (Gülya) əsərlərinin teletamaşalarında müxtəlif xarakterli rollar və "Afaq gülür güldürür" şousunda müxtəlif obrazlar yaradıb. "Bəxt üzüyü" filmində Söylü rolunda və Mozalan Satirik Kinojurnalıında "Uşaq bağçası", "Ət kombinatında", "Xaricdə belə deyil", "Belə də olur" nömrələrinin süjetlərində çəkilib.
Crossmedia.az yubileyi münasibətilə Xalq artisti Afaq Bəşirqızı ilə əlaqə saxlayıb: “İstər sənətkar, istərsə də adi insan həmişə öz çəkdiyi zəhmətin, gördüyü işin bəhrəsini görmək istəyir. Həmişə istəyir ki, onu qiymətləndirsinlər və onun çəkdiyi zəhmət düzgün dəyərləndirilsin. Çünki bütün bunlar daha çox sənətkarlara məxsusdur. Sənətkara həyatda nə qalır? Nə istəyir? Əlbəttə ona görə gələn insanlar, tamaşa salonunun dolması, əl çalan insanlar, ayaq üstə alqışlar, sevgi ilə göndərilən güllər... Bütün bunlar sənətkar ömrünü uzadır, həvəsini artırır və yeni yaradıcılığa sövq edir”.
Afaq Bəşirqızı Vaqif Səmədoğlu ilə olan xatirəsindən danışıb: “Aktyorluq xatirələri həddindən ziyadə çox olur və bu xatirələr mətbuat üçün olmur. Çünki bunlar şəxsi xatirələrdir. Sonra bu xatirələrin iştirakçılarından biri həyatda olmayanda aktyorun ən ağrılı yeri o olur ki, filan vaxtı, filan çəkilişdə o mənə bunu dedi. O qədər güldük ki, çəkiliş alınmadı və s. Mənim yadımda qalan xatirələrimdən biri “Bəxt üzüyü” filmində rəhmətlik dostum Vaqif Səmədoğlunun su satan işləməsi və bizi də milis idarəsinə əli-qolu bağlı aparmasıdır. Vaqifin orda su satması heç vaxt yadımdan çıxmaz. Bu mənə çox sevdiyim sənətkar Eldar Ryazanovu xatırlatdı. Çünki Eldar Ryazanov bütün çəkdiyi filmlərdə özü mütləq keçici epizodda çəkilirdi”.
Afaq Bəşirqızı sonda qeyd edib: “İnsana həmişə qayğı lazımdır. İnsan istər uşaq olsun, istər yeniyetmə, istərsə də ahıl. Bu qayğını əgər biz göstərmək istəyiriksə, deməli əlimizdən gələni etməliyik. Çünki biz bir-birimizə yaşam stimulu veririk. Yaşam stimulu da veirirksə deməli bir-birimizi yaşadırıq. Əsas da budur. Bu çətin, keşməkeşli həyatda hamımız bir-birimizə dəstək durmalıyıq. Göstərdiyiniz diqqətə görə hər birinizə təşəkkür edirəm”.
Ayhan
17:23 15.08.2025
Oxunuş sayı: 1528
