Bakıdakı Rus Evində Xalqların Mənəvi Birliyi Beynəlxalq Fondunun prezidenti görüş olub

Bakıdakı Rus Evində Bakının aparıcı kitabxanalarının rəhbərləri və alimlərin Xalqların Mənəvi Birliyi Beynəlxalq Fondunun prezidenti, fəlsəfə elmləri doktoru, M.V.Lomonosov adına Moskva Dövlət Universitetinin professoru V.A.Alekseyevlə görüşü keçirilib.

Tədbirdə Bakı şəhəri Yasamal rayon Mərkəzləşdirilmiş Kitabxana Sisteminin direktoru, tarix üzrə fəlsəfə doktoru, Fəxri mədəniyyət işçisi Lətifə Məmmədova qeyd etdi ki, bu gün mənəvi birlik məsələsi, cəmiyyətdə əxlaqi-mənəvi dəyərlərin qorunub saxlanması vacib məsələlərdən biridir. L.Məmmədova bildirdi ki, Azərbaycanın kitabxana fondlarında rus klassiklərinin həm Azərbaycan, həm də rus dillərində çoxlu sayda kitabları vardır. Kitabxanalarda rus ədəbiyyatı klassiklərinin yubileyləri keçirilir. Azərbaycan Prezidenti cənab İlham Əliyevin sərəncamları ilə 2004-2018-ci illər ərzində yerli və dünya klassiklərinin bir çox əsərləri latın qrafikasında yenidən nəşr olundu, onların arasında rus klassiklərinin əsərləri xüsusi yer tutur. M.Ş.Vazeh adına Mərkəzi Kitabxananın Fəxri oxucusu, publisist Reyhan Mirzəzadənin 20 ilə yaxındır ki, rus klassiklərinin həyat və yaradıcılığını tədqiq edir, kitablar nəşr etdirir. 2024-cü ildə o, A.S.Puşkinin və M.Y.Lermontovun yubileylərinə həsr olunmuş kitablar yazdı və nəşr etdirdi. İndi isə S.A.Yeseninin yubileyinə həsr olunmuş bilinqvistik kitabın üzərində işləyir.

Beynəlxalq Xalqların Mənəvi Birliyi Fondunun prezidenti, professor Valeri Alekseyev fondun 30 il ərzində gördüyü işlər barədə məlumat verdi. Bildirdi ki, fondun 9 filialı Şərqi Avropa və Yaxın Şərqdə fəaliyyət göstərir. Fond ictimaidir və cəmiyyətimizdə ən sağlam qüvvələrini özündə cəmləşdirir. O, rus dilinin MDB məkanında millətlərarası ünsiyyət dili kimi əhəmiyyətini diqqətə çatdırdı və dilin insanları bir-birindən ayırması deyil, birləşdirməsi barədə dəyərli fikir bildirdi.

Bakıdakı Rus Evinin direktoru, tanınmış ictimai xadim İrek Zinnurov ənənəvi dəyərlərin qorunub saxlanmasının və gələcək nəsillərə çatdırılmasının ideyasını vacib hesab etdi. O qeyd etdi ki, Azərbaycanda rus dilinə münasibət çox gözəldir və burda rus bölməsi olan 300 məktəb fəaliyyət göstərir.

Azərbaycan Dövlət Dillər Universitetinin Rus dili və ədəbiyyatı kafedrasının müdiri, professor Məmməd Əliyev qeyd etdi ki, mənəvi birlik mədəniyyətlərin və xalqların yaxınlaşmasında çox mühüm amildir. O, ölkəmizdə əsrlər boyu formalaşmış multikulturalizmin Azərbaycan modelinə diqqət çəkdi.

AMEA-nın Mərkəzi Elmi Kitabxanasının direktor müavini, tarix üzrə fəlsəfə doktoru Oruc Quliyev akademiyanın kitabxanasında rus dilində nadir kitabların olduğunu və kitabxanada bu nəşrlərin qorunmasını qeyd etdi. O, Elektron kataloq və Elektron kitabxana haqqında danışaraq, fondun kitabxanaya hədiyyə etdiyi kitabların orada öz əksini tapacağını və istifadəçilərin ixtiyarına veriləcəyini bildirdi.

Bakıdakı Rus Evinin əməkdaşı Lyubov Yakunina görüşün vacibliyini vurğuladı, görüş iştirakçılarına və qonaqlara təşəkkürünü bildirdi.

Tədbirdə Rusiyanın Azərbaycandakı Səfirliyinin birinci katibi Pavel Kuznetsov, Azərbaycan Dövlət Pedaqoji Universitetinin Elmi Kitabxanasının müdiri Z.Həsənova, Respublika Elmi-Texniki Kitabxanasının direktor müavinləri A.Orucova və S.Şıxlı, "Bakuinform" saytının rəhbəri L.Cavanşir, Ə.Vahid adına kitabxana filialının müdiri M.Qasımova, Səbail və Yasamal rayon Mərkəzləşdirilmiş Kitabxana sistemlərinin əməkdaşları və digər qonaqlar iştirak etdilər.

Sonda görüş iştirakçılarına Xalqların Mənəvi Birliyi Beynəlxalq Fondu tərəfindən nəşr olunmuş kitablar hədiyyə olundu.