Hər gün içdiyimiz içkinin yaratdığı onlarla xəstəlik - Diqqətli olun
Çay Azərbaycan süfrəsinin ayrılmaz içkilərindən biri olsa da, onun həddindən artıq və nəzarətsiz istifadəsi sağlamlıq üçün müəyyən risklər yarada bilər. Xüsusilə mədə-bağırsaq, şəkər və mədəaltı vəzi ilə bağlı problemləri olan, eləcə də artıq çəkidən əziyyət çəkən şəxslərin çay qəbuluna daha diqqətli yanaşması tövsiyə olunur. Çayın miqdarı ilə yanaşı, onun dəmlənmə qaydası və hansı qidalarla birlikdə qəbul edilməsi də sağlamlıq baxımından əhəmiyyət daşıyır.
Crossmedia.az-a açıqlamasında terapevt, sağlam qidalanma mütəxəssisi Alidə İbrahimova bildirib ki, müəyyən xəstəlikləri olan şəxslər çay qəbulunda daha diqqətli olmalıdırlar:
“Mədə-bağırsaq xəstəlikləri, şəkərli diabet, mədəaltı vəzi xəstəlikləri və artıq çəkisi olan şəxslər çaydan daha diqqətli istifadə etməlidirlər. Çayın miqdarı da ölçülü olmalıdır. Gün ərzində maksimum iki fincan çay içməyi məsləhət görürəm.
Çayın isti olması ilə yanaşı, dəminin mədə selikli qişasına qıcıqlandırıcı təsiri də artır. Bu isə mədə turşuluğunun artmasına səbəb ola bilər”.
Həkim qeyd edib ki, nəticədə qastrit, eroziya və qarşısı alınmadıqda xora xəstəliyinə qədər gedib çıxan problemlər yarana bilər: “Qara çaydan həddindən artıq istifadə zamanı insan daha çox müxtəlif şirin və unlu qidalara ehtiyac hiss edə bilər. Bu isə insulin müqaviməti və şəkərli diabet baxımından risk yaradır. Mədəaltı vəzinin sevmədiyi qidalar arasında həddindən artıq unlu və şirin məhsullar da var. Bu səbəbdən çayla birlikdə belə qidaların qəbulunu məsləhət görmürəm.
Eyni zamanda, mədə, öd və mədəaltı vəzi xəstəlikləri zamanı qəbizlik də yarana bilər. Qəbizlik olduqda halsızlıq, əsəbilik, yorğunluq, səpkili və qaşınan dəri, saç tökülməsi kimi problemlər meydana çıxa bilər.
Qara çaydan daha çox istifadə edən insanlar, adətən, suyu kifayət qədər qəbul etməyənlərdir. Halbuki adi qazsız suyun qəbulu məsləhət görülür. Gün ərzində qəbul ediləcək suyun miqdarını hər kiloqram çəkiyə 0,033 litr hesabı ilə müəyyən etmək olar.
Suyu kifayət qədər qəbul etdikdə çayı da bədən çəkimizə uyğun və ölçülü şəkildə içmək lazımdır. Belə olduqda sağlamlıq, gözəllik və yüksək əhval-ruhiyyə üçün daha düzgün seçim etmiş oluruq".
Zeynəb Həsən
14:00 14.08.2026
Oxunuş sayı: 41
