KİV: Ukraynanın enerji zərbələri Rusiyanın müharibə imkanlarını zəiflədir
Böyük Britaniyanın The Telegraph nəşri hesab edir ki, Ukraynanın Rusiyanın enerji infrastrukturuna endirdiyi zərbələr Moskvanın iqtisadi və hərbi imkanlarını zəiflədərək müharibənin gedişində dönüş nöqtəsinə çevrilə bilər.
Crossmedia.az xəbər verir ki, bu barədə The Telegraph qəzetinin icmalçısı Ambroz Evans-Pritçard yazıb.
Məqalədə bildirilir ki, tammiqyaslı müharibənin dördüncü ilində Ukrayna pilotsuz sistemlər sahəsində imkanlarını əhəmiyyətli dərəcədə artırıb. Nəşrin məlumatına görə, son günlər Ukrayna qüvvələri Qara dəniz hövzəsində onlarla neft və qaz tankerinə, eləcə də Sankt-Peterburqdan Sibirdəkədək yerləşən neft emalı zavodlarına zərbələr endirib.
Müəllif yazır ki, Kiyevin strategiyası təkcə Rusiyanın enerji ixracını azaltmağa deyil, həm də ölkənin hərbi əməliyyatları davam etdirmək imkanlarını zəiflətməyə hesablanıb. S&P Global Energy şirkətinin qiymətləndirməsinə əsasən, Rusiyanın neft emalı güclərinin təxminən 60 faizi fəaliyyətini dayandıra bilər. Bu səbəbdən Moskva yanacaq ixracını məhdudlaşdırıb və Qazaxıstanla Hindistandan yanacaq idxal etməyə məcbur olub.
Nəşr qeyd edir ki, enerji sektoruna təzyiq Rusiyada dərinləşən maliyyə problemləri ilə üst-üstə düşür. Məqalədə bildirilir ki, federal büdcənin neft və qaz gəlirləri ilin ilk yarısında azalıb, eyni zamanda hökumət daxili yanacaq qiymətlərini sabit saxlamaq üçün subsidiyaları artırıb. Reuters agentliyinin məlumatına görə, Rusiyada 2026-cı ildə bank böhranı riski də müzakirə olunur.
Məqalədə cəbhədəki vəziyyətə də toxunulur. Müəllif yazır ki, Rusiya böyük itkilər verməyə davam edir və yeni hərbçilərin cəlb olunması tempində azalma müşahidə olunur. Bu kontekstdə Rusiyanın müxalif "Verstka" nəşrinin "Sanki insan ehtiyatımız tükənib. Pul müqabilində döyüşməyə gedənlər artıq qalmayıb" fikrinə istinad edilir.
Məqalədə Atlantic Council analitiki Alan Raylinin mövqeyi də yer alıb. O hesab edir ki, Kreml ümumi səfərbərlik elan edərsə, bu addım ölkə daxilində ciddi siyasi nəticələrə səbəb ola bilər.
Müəllifin fikrincə, Rusiya NATO-nu parçalamaq və ABŞ Prezidenti Donald Trampı Moskva üçün sərfəli mövqeyə gətirmək kimi xarici siyasət məqsədlərinə də nail ola bilməyib.
Yazıda vurğulanır ki, mövcud tendensiyalar davam edərsə, Rusiya iqtisadi böhranla yanaşı, hərbi və siyasi baxımdan da ciddi çətinliklərlə üzləşə bilər ki, bu da Avropada qüvvələr balansına təsir göstərə bilər.
Qeyd edək ki, məqalədə səsləndirilən fikirlər müəllifin və istinad edilən ekspertlərin qiymətləndirmələridir. Bu proqnozlar müstəqil şəkildə təsdiqlənmiş fakt kimi təqdim edilmir.
17:41 17.07.2026
Oxunuş sayı: 76
