Konqodakı Ebola epidemiyası ABŞ-nin mədən layihələrini ləngidir
Konqo Demokratik Respublikasında (KDR) yüzlərlə insanın həyatına son qoyan Ebola epidemiyası ABŞ-nin dəstəklədiyi iri mədən layihələrinin icrasına və yeni investisiya danışıqlarına mənfi təsir göstərib.
Crossmedia.az xəbər verir ki, bu barədə Reuters məsələ ilə tanış olan mənbələrə istinadən məlumat yayıb.
Məlumata görə, ABŞ-nin dəstəklədiyi mədən şirkətlərindən biri karantin tədbirləri və digər məhdudiyyətlərin ABŞ–KDR Strateji Tərəfdaşlıq Sazişi çərçivəsində davam edən hasilat işlərinə hələlik birbaşa təsir etmədiyini bildirib.
Bununla belə, ABŞ investisiyalarına məsləhət verən iki ekspert və bir diplomat qeyd ediblər ki, epidemiya mövcud tərəfdaşlığın genişləndirilməsi üzrə danışıqları demək olar ki, dayandırıb. Xatırladılıb ki, sözügedən tərəfdaşlıq 2025-ci ildə Çinin Konqonun zəngin mis və kobalt yataqlarındakı artan təsirinə qarşı imzalanmışdı.
Şirkət rəsmiləri bildiriblər ki, təchizatçılar, məsləhətçilər və investorların səfərlərinin təxirə salınması ciddi logistika problemləri yaradıb, ölkəyə personalın giriş-çıxışı isə getdikcə çətinləşir.
Diplomatik mənbənin sözlərinə görə, epidemiya ABŞ–Konqo mədən əməkdaşlığının inkişafını ləngidib və planlaşdırılan bir sıra görüşlər təxirə salınıb. Bildirilib ki, ötən ay Vaşinqtonda keçirilməsi nəzərdə tutulan və ABŞ şirkətlərinin Konqodakı layihələrə marağının qiymətləndirilməsinə həsr olunan toplantı da təxirə salınıb. Bununla yanaşı, danışıqların London və digər şəhərlərdə davam etdiyi qeyd olunub.
Məsləhətçilərdən biri isə bəzi investorların və rəsmilərin görüşləri Paris və Brüsselə köçürdüklərini bildirib. Onun sözlərinə görə, iyul ayında keçirilməsi planlaşdırılan layihələrin qiymətləndirilməsi toplantısı əsas tərəfdaşların ABŞ-dən səfər edə bilməməsi səbəbindən tamamilə ləğv edilib.
Şirkət nümayəndələri xəbərdarlıq ediblər ki, səfərlərdə yaranan problemlər layihələrin icra qrafikində ciddi gecikmələrə səbəb ola bilər.
17:21 16.07.2026
Oxunuş sayı: 64
