Araşdırma: Çay təzyiqinizi aşağı salmağa kömək edə bilər
Mütəxəssislər bildirirlər ki, çay, xüsusilə yaşıl və qara çay, ürək-damar sağlamlığına müsbət təsir göstərə və arterial təzyiqin tənzimlənməsinə kömək edə bilər.
Crossmedia.az xəbər verir ki, həkim-kardioloq Çen-Han Çen sağlam qidalanmanın qan təzyiqinin nəzarətdə saxlanılmasında mühüm rol oynadığını bildirib.
Araşdırmada qeyd edilir ki, müxtəlif növ çayların müntəzəm istifadəsi zamanla hipertoniyanın inkişaf riskini azalda, həmçinin sistolik (yuxarı) qan təzyiqinin aşağı düşməsinə səbəb ola bilər. Medicine jurnalında dərc olunan meta-analiz isə yaşıl çay və ya onun ekstraktından istifadə edən şəxslərdə həm sistolik, həm də diastolik (aşağı) təzyiq göstəricilərinin əhəmiyyətli dərəcədə azaldığını göstərib.
ABŞ-nin Ohayo Dövlət Universitetinin Veksner Tibb Mərkəzinin kardioloqu Raqavendra Baliqanın sözlərinə görə, yaşıl və qara çayın tərkibindəki polifenollar qan damarlarının daxili qatının fəaliyyətini yaxşılaşdırır, oksidləşdirici stresi azaldır və damarları genişləndirən azot oksidinin sintezini artırır. Bu da qan dövranını yaxşılaşdıraraq təzyiqin tədricən aşağı düşməsinə kömək edə bilər.
Dietoloq Tara Kollinqvud isə qeyd edib ki, bu təsir uzunmüddətli və mülayim xarakter daşıyır.
Həkimlər çayın faydalarına baxmayaraq, bəzi risklərin də nəzərə alınmalı olduğunu bildirirlər. Çayın tərkibindəki kofein qısa müddət ərzində qan təzyiqini yüksəldə bilər. Bundan əlavə, yaşıl çay bəzi dərmanlarla, o cümlədən varfarin və beta-blokatorlarla qarşılıqlı təsirə girə, həmçinin dəmir və fol turşusunun mənimsənilməsini azalda bilər.
Mütəxəssislərin sözlərinə görə, gündə beş fincandan çox çay içilməsi yuxusuzluq, mədə-bağırsaq problemləri və dəmir çatışmazlığı riskini artıra bilər. Bəzi bitki çayları, xüsusilə biyan kökü tərkibli çaylar isə əksinə, qan təzyiqini yüksəldə bilər.
Hansı çay daha faydalıdır?
Mövcud elmi araşdırmalara əsasən, arterial təzyiqin tənzimlənməsi baxımından ən faydalı seçim yaşıl çay hesab olunur. Ondan sonra hibiskus çayı gəlir. Qara çayın da mülayim müsbət təsir göstərə biləcəyi qeyd edilir.
Mütəxəssislər əlavə edirlər ki, şəkərsiz çayın müntəzəm istifadəsi ümumilikdə ürək-damar sağlamlığının qorunmasına dəstək verə bilər. Bununla belə, yüksək qan təzyiqindən əziyyət çəkən şəxslər müalicəni yalnız çayla əvəz etməməli və həkim məsləhətinə əməl etməlidirlər.
04:40 04.07.2026
Oxunuş sayı: 92
