Mütəxəssislər qəhvəyə alternativ 7 içkini açıqlayıblar
Qəhvədən tamamilə imtina etmək və ya onun qəbulunu azaltmaq istəyənlər üçün bir sıra faydalı alternativlər mövcuddur. Crossmedia.az xəbər verir ki, bu barədə ˝Verywell Health˝ nəşri yazıb.
Mütəxəssislərin fikrincə, bu içkilər enerji verməklə yanaşı, ürək, həzm sistemi və ümumi sağlamlığa da müsbət təsir göstərə bilər.
Matcha çayı qəhvəyə ən məşhur alternativlərdən biri hesab olunur. Toz halında hazırlanan yaşıl çayın tərkibində olan EGCG antioksidantı iltihabı azaltmağa və ürək sağlamlığını dəstəkləməyə kömək edə bilər. Araşdırmalara görə, matchadakı kofein və L-teanin amin turşusunun birgə təsiri qəhvə ilə müqayisədə daha sabit enerji və diqqət təmin edir.
Masala çayı da tövsiyə olunan alternativlər sırasındadır. Darçın, hil, zəncəfil, mixək və qara istiot əlavə edilən bu çayın bir fincanında təxminən 21 mq kofein olur. Müqayisə üçün, bir fincan qara qəhvədə bu göstərici orta hesabla 90 mq təşkil edir. Tərkibindəki ədviyyatlar immun sistemini, ürək-damar və həzm sistemini dəstəkləyə bilər.
Göbələk qəhvəsi son illər populyarlıq qazanan içkilərdəndir. O, üyüdülmüş qəhvənin kordiseps, reyşi, çaga və digər müalicəvi göbələklərlə qarışığından hazırlanır. Bu göbələklər adaptogen hesab olunur və orqanizmin stressə uyğunlaşmasına kömək edə bilər.
Yerba mate Cənubi Amerikada geniş istifadə olunan içkidir. Bir fincanında təxminən 80 mq kofein olsa da, tərkibindəki teobromin və teofilin sayəsində qəhvədən fərqli olaraq əsəbilik yaratmadan enerji verdiyi bildirilir.
Kasnı kökündən hazırlanan qəhvə isə qəhvə dadını xatırlatsa da, ümumiyyətlə kofein ehtiva etmir. Onun tərkibində bağırsaq mikroflorasını dəstəkləyən inulin adlı prebiyotik lif mövcuddur.
Mütəxəssislər həmçinin nanə çayı, qızıl süd (zərdəçal, süd, darçın və qara istiotla hazırlanan içki) və roybuş çayını da qəhvəyə sağlam alternativlər kimi göstərirlər. Bu içkilərin iltihabəleyhinə, həzmi yaxşılaşdıran və ürək sağlamlığını dəstəkləyən xüsusiyyətlərə malik olduğu qeyd edilir.
Bundan əvvəl aparılmış başqa bir araşdırmada isə müntəzəm qəhvə qəbulunun qaraciyər xəstəliklərinin inkişaf riskini azaltdığı müəyyən edilib. Alimlər ən güclü müsbət təsirin gündə 3–4 fincan qəhvə qəbul edən şəxslərdə müşahidə olunduğunu bildiriblər.
06:00 04.07.2026
Oxunuş sayı: 271
