Çin və Yaponiya yenidən qarşı-qarşıya: Pekindən Tokionun gəmilərinə sərt xəbərdarlıq
Çin Şərqi Çin dənizində fəaliyyət göstərən iki Yaponiya tədqiqat gəmisindən işləri dayandırmağı tələb edib, Tokio isə buna etirazını Pekinə diplomatik kanallarla çatdırıb.
Crossmedia.az xəbər verir ki, Bloomberg bu barədə məlumat yayıb.
Yaponiyanın Nazirlər Kabinetinin baş katibi Minoru Kiharanın sözlərinə görə, Tokio Çin tərəfinə bildirib ki, dəniz tədqiqatları Yaponiyanın müstəsna iqtisadi zonasında aparılır və Pekinin bu fəaliyyətin dayandırılması tələbi qəbuledilməzdir.
Kihara qeyd edib ki, Yaponiyanın Sahil Mühafizəsinə məxsus "Takuyo" və "Koyo" tədqiqat gəmiləri Çin hökumət gəmilərindən radio vasitəsilə fəaliyyətlərini dayandırmaları barədə xəbərdarlıq alıblar.
Onun sözlərinə görə, "Koyo" gəmisi Tokionun nəzarətində olan, lakin Çinin də iddia etdiyi Senkaku (Çinin adlandırdığı Diaoyudao) adaları yaxınlığında, Uotsuri adasından təxminən 80 kilometr şimal-qərbdə yerləşib.
Yaponiya Sahil Mühafizəsi cavab olaraq Çin gəmilərinə dəniz tədqiqatlarının beynəlxalq hüquqa uyğun və tam qanuni şəkildə həyata keçirildiyini bildirib. Kihara əlavə edib ki, hər iki tədqiqat gəmisi hazırda da həmin ərazidə fəaliyyətini davam etdirir.
Bloomberg qeyd edir ki, bu hadisə Şərqi Çin dənizində ərazi mübahisələri fonunda Pekin və Tokio arasında gərginliyin artdığını və diplomatik münasibətlərin daha da pisləşdiyini göstərir.
14:00 02.07.2026
Oxunuş sayı: 49
