Azərbaycan QDTİB ilə infrastruktur və enerji sahəsində əməkdaşlığı genişləndirəcək
Azərbaycan Qara Dəniz Ticarət və İnkişaf Bankı (QDTİB) ilə infrastruktur və enerji sahəsində əməkdaşlığı genişləndirəcək.
Crossmedia.az xəbər verir ki, bunu maliyyə naziri Sahil Babayev "Qara Dəniz Ticarət və İnkişaf Bankının Rəhbərlər Şurasının 28-ci İllik Toplantısı"nda deyib.
Onun sözlərinə görə, Azərbaycan bankla infrastruktur, bərpa olunan enerji, nəqliyyat bağlantıları, eləcə də maliyyə sektorunun inkişafı daxil olmaqla, müxtəlif istiqamətlər üzrə əməkdaşlığın daha da genişləndirilməsində maraqlıdır: "Bankın 2025-ci ildə enerji təhlükəsizliyinə xüsusi önəm verməsi Azərbaycanın strateji prioritetləri ilə üst-üstə düşür. İllik hesabatda qeyd olunduğu kimi, enerji təhlükəsizliyi Qara dəniz regionu üçün getdikcə daha mühüm məsələyə çevrilir. Azərbaycan etibarlı enerji təchizatçısı və strateji tranzit qovşağı kimi regionda enerji təhlükəsizliyinin gücləndirilməsini prioritet hesab edir. Eyni zamanda, hökumət "yaşıl keçid" gündəliyinə və iqlim öhdəliklərinə uyğun olaraq bərpa olunan enerji sahəsinə iri həcmli investisiyalar yatırır".
11:19 01.07.2026
Oxunuş sayı: 54
