D8: yeni imkanlar və yeni hədəflər
Məlum olduğu kimi, dekabrın 19-da Misirin paytaxtı Qahirə şəhərində D-8 İqtisadi Əməkdaşlıq Təşkilatının XI Sammiti baş tutmuşdur. D-8 İqtisadi Əməkdaşlıq Təşkilatı iqtisadi əməkdaşlığı təşviq etmək məqsədilə 1997-ci ildə Türkiyə, Pakistan, İran, İndoneziya, Malayziya, Misir, Banqladeş və Nigeriya tərəfindən yaradılmış bir beynəlxalq təşkilatdır. Bu təşkilatın əsas məqsədi üzv ölkələr arasında iqtisadi, ticarət, maliyyə və texnoloji əməkdaşlığı inkişaf etdirmək, sosial və mədəni əlaqələri gücləndirməkdir. Ölkəmiz də bu Sammitdə Azərbaycan Respublikasının Baş naziri Əli Əsədovun rəhbərlik etdiyi nümayəndə heyəti ilə təmsil olunub. Qeyd edək ki, ölkəmiz ilk dəfə Prezident İlham Əliyevin xüsusi qonaq qismində iştirak etdiyi 2017-ci ildə İstanbulda keçirilmiş IX Zirvə görüşündə təmsil olunub. Azərbaycan üçün geniş perspektivlər vəd edən D-8 İqtisadi Əməkdaşlıq Təşkilatına üzvlüyümüzün yekdilliklə qəbul olunması cənab Prezidentin qətiyyətli və uğurlu xarici siyasətinin məntiqi nəticəsidir.
Üç qitəni əhatə edən, 4 trilyon ABŞ dollardan artıq ÜDM-ə malik, 130 milyard ticarət dövriyyəsi həyata keçirən, nominal ÜDM-i 5 trilyon 199 milyon dollar, real ÜDM-i isə 18 milyard 182 milyon dollar olan, əhalisinin ümumi sayı dünya müsəlmanlarının 60 faizini təşkil edən və böyük iqtisadi potensiala sahib olan “İslam Səkkizliyi” adlandırılan D-8-ə Azərbaycanın üzvlüyü, ölkəmizin beynəlxalq arenadakı artan nüfuzunun və ona göstərilən etimadın açıq göstəricisidir. Tarix boyunca Şərq ilə Qərb arasında körpü rolunu oynayan və İslam dünyasının mühüm mədəni, dini və sivilizasiya mərkəzlərindən biri olan Azərbaycanın D-8 üzvlüyü, eyni zamanda, İslam həmrəyliyinin gücləndirilməsinə, İslam dəyərlərinin qlobal miqyasda təbliğinə və islamofobiyaya qarşı mübarizəyə əhəmiyyətli töhfə verəcəkdir.
Təsadüfi deyil ki, D-8 İqtisadi Əməkdaşlıq Təşkilatına üzv ölkələrin liderləri də Azərbaycanın D-8-ə üzv olmasını qiymətləndirərkən, Azərbaycanın təkcə təşkilatı genişləndirmək baxımından deyil, eyni zamanda təşkilata əlavə dəyər və güc qataraq qarşıya qoyulmuş hədəflərə çatmasına öz töhfəsini verəcəyinə əminliklərini ifadə ediblər. Bu əməkdaşlıq platforması regionumuzda təhlükəsizlik, sabitlik, rifah və qarşılıqlı faydalı əməkdaşlığın təşəkkül tapması, həmçinin iqtisadi-ticarət, nəqliyyat, kommunikasiya və digər vacib sahələrdə əlaqələrin inkişaf etdirilməsi baxımından xüsusi əhəmiyyət daşıyır. Heç şübhəsiz ki, ölkəmizin D8-ə qoşulması Qafqaz regionunun geosiyasi və iqtisadi dinamikasına əhəmiyyətli təsir göstərəcək. Bu əməkdaşlıq yeni imkanlar açaraq xarici investisiyaların cəlb edilməsinə zəmin yarada bilər. Azərbaycanın Şərq-Qərb və Şimal-Cənub nəqliyyat dəhlizlərində birləşdirici rol oynaması fonunda da bu təşkilata üzv olmaq ölkəmizin uğurlarını, eləcə də təşkilatın imkanlarını daha da artıracaq.
Lətif Zeynallı
İqtisadi İslahatların Təhlili və Kommunikasiya Mərkəzi,
Strateji planlaşdırma şöbəsi, aparıcı məsləhətçi
14:32 20.12.2024
Oxunuş sayı: 10333
