Yunan mətbuatı: Ankara Yunanıstanı hər tərəfdən mühasirəyə alır
Türkiyə Milli Kəşfiyyat Təşkilatının (MİT) rəhbəri İbrahim Kalının Benqaziyə səfəri və Liviya Milli Ordusunun (LNO) baş komandanı Xəlifə Haftarla görüşü Yunanıstan mətbuatının diqqət mərkəzinə çevrilib.
Crossmedia.az xəbər verir ki, bu barədə Kathimeri qəzeti yazıb.
Qeyd edək ki, Kalının səfəri Ankaranın Benqaziyə dəstəyini göstərir və məqsəd Liviya Nümayəndələr Palatasında (şərq administrasiyası) enerji resurslarının kəşfiyyatına dair sazişin ratifikasiyasıdır. Bu addım Yunanıstan və Kipr yunanlarının Şərqi Aralıq dənizindəki iddialarını zəiflədir və Afinanın “qanunsuzluq” arqumentini əlindən alır.
Qəzet həmçinin xatırladır ki, yaxın günlərdə Türkiyə Hərbi Dəniz Qüvvələrinə aid TCG Kınalıada korveti Benqazi limanına səfər edib. Gəmini müşayiət edən yüksək səviyyəli türk nümayəndə heyətini Xəlifə Haftarın oğlu, LNO-nun komandan müavini Səddam Haftar qarşılayıb.
Kathimerininin məlumatına görə, Ankaranın Haftarla yaxınlaşmasını Türkiyənin Misirlə münasibətləri yaxşılaşdırmaq istiqamətində atdığı diplomatik addımlardan ayırmaq olmaz. Qeyd olunur ki, Qahirə Türkiyənin istehsalı olan KAAN beşinci nəsil qırıcılarına maraq göstərə bilər.
Bildirək ki, Nea qəzetinin yazdığına görə, Ankara təsir dairəsini demək olar ki, bütün Afrika ölkələrinə yayır və Liviyadakı fəallıq bu strategiyanın bir hissəsidir. Qəzet bunu “Türkiyənin Afrikaya nüfuzunun zirvəsi” adlandırır.
Europost isə Yunanıstan hökumətini passivlikdə günahlandırır. Nəşrin fikrincə, Afina vaxtilə Liviya şərqinin liderləri ilə təmas qurub, lakin dəstəyi dayandıraraq onları Ankaraya yaxınlaşdırmış olub:
“Yunanıstan diplomatik və müdafiə strategiyasının olmaması səbəbindən geosiyasi mühasirə vəziyyətinə düşə bilər. Ərdoğan bu prosesi ustalıqla idarə edir və artıq nəticələr əldə edir".
Nəşr əlavə edir ki, Afinanın “izaholunmaz passivliyi” ölkənin beynəlxalq mövqelərini zəiflədir.
Xatırladaq ki, 2014-cü ildən Liviya iki rəqib administrasiyaya bölünüb: Tripolidə yerləşən və beynəlxalq ictimaiyyət tərəfindən tanınan Milli Razılıq Hökuməti, eləcə də Benqazidə fəaliyyət göstərən, Nümayəndələr Palatasının dəstəyi və Xəlifə Haftarın nəzarəti altında olan şərq administrasiyası.
2019-cu ildə Tripoli hökuməti Türkiyə ilə dəniz sərhədlərinin müəyyən edilməsinə dair saziş imzalayıb. Bu sazişin Benqazidəki administrasiya tərəfindən ratifikasiyası Ankaranın bölgədəki mövqelərini əhəmiyyətli dərəcədə gücləndirə bilər.
Xumar Emilqızı
20:03 09.09.2025
Oxunuş sayı: 5259
