İran və Ermənistan Türkiyə ilə münasibətlərin normallaşmasını müzakirə edib
Bu gün Ermənistan parlamentinin vitse-spikeri Ruben Rubinyan İrəvanda İranın xarici işlər nazirinin müavini Vahid Cəlalzadə ilə görüşüb.
Crossmedia.az xəbər verir ki, görüş zamanı Rubinyan Ermənistan ilə İran arasında formalaşmış dostluq münasibətlərinə toxunaraq bildirib ki, ikitərəfli əlaqələr qarşılıqlı hörmət və etimad prinsipləri əsasında inkişaf edir. Onun sözlərinə görə, qarşılıqlı səfərlər və siyasi dialoq ikitərəfli gündəliyin daha da genişlənməsinə və mövcud əməkdaşlığın dərinləşməsinə şərait yaradır.
Danışıqlar zamanı Ermənistan və Türkiyə arasında münasibətlərin normallaşması prosesi də diqqət mərkəzində olub.
Rubinyan qeyd edib ki, Ermənistan Türkiyə ilə diplomatik münasibətlərin bərpasına və sərhədlərin açılmasına tam hazırdır. “Bu prosesi ləngidən heç bir səbəb yoxdur. Ermənistan sabahdan belə sərhədlərin açılmasına və diplomatik əlaqələrin qurulmasına hazırdır”, – deyə o, vurğulayıb.
18:10 09.09.2025
Oxunuş sayı: 5094
