Erməni deputat: Azərbaycanın müdafiə büdcəsi daha böyükdür, çünki onlar ölkə olaraq bizdən daha zəngindir
Hərbi büdcənin həcmini eyni səviyyədə saxlamaq hərbi büdcənin olmaması demək deyil, bu o deməkdir ki, büdcə əvvəlki ildə olduğu kimi qalır və həmin büdcə çərçivəsində silahlanma həyata keçirilir.
Crossmedia.az xəbər verir ki, bunu jurnalistlərlə söhbətində Ermənistan parlamentinin hakim “Vətəndaş Müqaviləsi” fraksiyasının deputatı, Avropa inteqrasiyası məsələləri üzrə daimi komissiyanın sədri Arman Yeğoyan deyib.
Yeğoyan qeyd edib ki, Ermənistanın müdafiə büdcəsi hər il artır, bu da o deməkdir ki, dəyişməz qala biləcək büdcə həcmi artıq əvvəlki illərin göstəriciləri ilə müqayisədə artırılmış həcmdir.
O bildirib ki, hər bir dövlət öz ehtiyacları üçün silah ala bilər.
“Biz də silahlanırıq, Azərbaycan da silah alır. Kimsə deyibmi ki, hansısa dövlət silah almamalıdır?”, - deyə erməni deputat bildirib.
Yeğoyan qeyd edib ki, əgər Azərbaycan Prezidenti Əliyevin çıxışını dinləsələr, o da sülhdən danışır.
“Dünyanın bütün orduları döyüş tapşırıqlarını yerinə yetirməyə hazır olmalıdır. Bəs o nə deməlidir? Döyüş tapşırıqlarını yerinə yetirməyə hazır olmamalıdırmı? Kim deyib ki, bizim yeni müqavilələrimiz olmayacaq?”, - deyə Yeğoyan suallar ünvanlayıb.
O bildirib ki, Azərbaycanın müdafiə büdcəsi daha böyükdür, çünki Azərbaycan ölkə olaraq Ermənistandan daha zəngindir.
18:17 09.09.2025
Oxunuş sayı: 5914
