İsrail Dohaya hava zərbələri endirdi: HƏMAS-ın yüksək rəhbərliyi məhv edildi, Qətər sərt reaksiya verdi
İsrailin Qətərin paytaxtı Dohaya hava hücumu etdiyi, şəhərdə on partlayışın baş verdiyi bildirilir.
Crossmedia.az xəbər verir ki, bu barədə Reuters məlumat yayıb.
Hücum nəticəsində HƏMAS-ın yüksək vəzifəli rəhbərləri məhv edilib. İsrailli jurnalist Amit Seqal qeyd edib ki, zərərçəkənlər arasında ABŞ-la danışıqlar aparan HƏMAS nümayəndə heyətinin üzvləri də olub.
Qeyd edək ki, İsrailin 12-ci telekanalı yerli rəsmiyə istinadən bildirib ki, əməliyyat nəticəsində təşkilatın yüksək səviyyəli üzvləri Dohada zərərsizləşdirilib. Hücum İsrail Hərbi Hava Qüvvələrinin qırıcıları tərəfindən həyata keçirilib və ABŞ-lə əvvəlcədən razılaşdırılıb.
İsrail Ordusu (IDF) və təhlükəsizlik xidməti ŞABAK açıqlamasında, zərbələrin 7 oktyabr hücumlarının təşkili və İsrailə qarşı aparılan müharibəyə görə məsuliyyət daşıyan HƏMAS rəhbərliyinə endirildiyini vurğulayıb. Onların sözlərinə görə, mülki əhaliyə zərərin minimuma endirilməsi üçün yüksək dəqiqlikli sursatlardan və əlavə kəşfiyyat məlumatlarından istifadə olunub.
İsrail tərəfi bildirib ki, HƏMAS-a qarşı qətiyyətli əməliyyatlarını davam etdirəcək.
Qətər isə Dohaya edilən hücumu “cinayətkar addım”, beynəlxalq hüququn pozulması və ölkənin təhlükəsizliyinə təhdid adlandıraraq sərt şəkildə qınayıb. Rəsmi açıqlamada vurğulanıb ki, Qətər belə məsuliyyətsiz davranışı qəbul etməyəcək və məsələ üzrə ali səviyyədə araşdırma aparılır.
Xumar Emilqızı
17:56 09.09.2025
Oxunuş sayı: 1412
