Bu il Ermənistanla sülh sazişinin imzalanması üçün üç əsas şərt açıqlanıb
Cənubi Qafqazda post-münaqişə mərhələsinin yeni siyasi və hüquqi çərçivəsinin formalaşdırılması prosesi davam edir. Bakı ilə İrəvan arasında aparılan danışıqlar artıq təkcə hərbi qarşıdurmadan sonrakı vəziyyətin tənzimlənməsi deyil, regionda uzunmüddətli sülh arxitekturasının qurulması məsələsini də gündəmə gətirir. Bu kontekstdə 2026-cı il ərzində tərəflər arasında real və dayanıqlı sülh sazişinin imzalanıb-imzalanmayacağı əsas müzakirə mövzularından biri olaraq qalır.
Mövzu ilə bağlı Crossmedia.az-a açıqlamasında siyasi şərhçi Xasay Gəraylı bildirib ki, 2020-ci ildən sonra Cənubi Qafqazda yeni siyasi reallıq yaranıb: "Azərbaycan öz suverenliyini və ərazi bütövlüyünü tam bərpa edib və münaqişə mərhələsi faktiki olaraq bağlanıb. Hazırda gündəmdə olan əsas məsələ isə bu yeni reallığın beynəlxalq hüquqi sənədlərlə təsbit edilməsidir. Azərbaycanın mövqeyi prinsipial və ardıcıldır. Sülh sazişi qarşılıqlı şəkildə ərazi bütövlüyünün və dövlət sərhədlərinin tanınmasına əsaslanmalıdır. Gələcəkdə hər hansı ərazi iddiasına imkan verə biləcək hüquqi boşluq qalmamalıdır. Birinci əsas məsələ Ermənistanın hüquqi bazasında Azərbaycana qarşı dolayı və ya birbaşa iddiaların tam şəkildə aradan qaldırılmasıdır. Əks halda, hüquqi ziddiyyət qalarsa, imzalanacaq sənəd uzunömürlü və davamlı ola bilməz".
X. Gəraylı ikinci mühüm istiqamət kimi sərhədlərin delimitasiya və demarkasiyası prosesini göstərib: "Sərhədlər dəqiq müəyyənləşdirilmədən və qarşılıqlı şəkildə tanınmadan regionda təhlükəsizlik və tərəqqi mühitinin tam sabitləşməsi çətin görünür. Üçüncü və strateji faktor kimi regional kommunikasiyaların açılmasını xüsusi vurğulayıb. Onun sözlərinə görə, nəqliyyat və iqtisadi əlaqələr tam şəkildə bərpa olunarsa, sülh yalnız siyasi bəyanatlar üzərində deyil, real iqtisadi maraqlar və qarşılıqlı asılılıq əsasında möhkəmlənəcək. Zəngəzur istiqamətində kommunikasiyanın açılması təkcə Azərbaycan üçün deyil, bütövlükdə Cənubi Qafqaz üçün yeni iqtisadi dinamika və inteqrasiya imkanları yarada bilər. İqtisadi qarşılıqlı açıqlıq və əməkdaşlıq siyasi sabitliyin ən güclü təminatlarından biri hesab olunur. 2026-cı ilə gəldikdə isə qeyd olunan üç istiqamət üzrə real və praktik irəliləyiş əldə olunarsa, sülh sazişinin imzalanması tam real görünür. Bununla belə, Azərbaycan üçün prioritet məsələ sadəcə sənədin imzalanması deyil, hüquqi baxımdan qəti, siyasi baxımdan sabit və iqtisadi baxımdan dayanıqlı modelin formalaşdırılmasıdır".
Nigar Yahyazadə
15:53 20.02.2026
Oxunuş sayı: 771
