İran və Rusiya Hind okeanında birgə dəniz təlimi keçirib
ABŞ ilə artan regional gərginlik fonunda İran və Rusiya hərbi dəniz qüvvələri Hind okeanının şimal hissəsində birgə təlimlərin əsas mərhələsini icra ediblər.
Crossmedia.az bu barədə xarici mediaya istinadən xəbər verir. Təlimlərdə İran Ordusunun Hərbi Dəniz Qüvvələri, İslam İnqilabı Keşikçiləri Korpusunun (SEPAH) Hərbi Dəniz Qüvvələri və Rusiya Hərbi Dəniz Qüvvələrinin bölmələri iştirak edib.
Ssenariyə əsasən, Oman körfəzində “qaçırılmış gəminin xilas edilməsi” əməliyyatı məşq olunub. Xüsusi təyinatlı dəstələr hədəf gəmiyə hücum edərək girov götürüldüyü ehtimal edilən heyət üzvlərinin azad edilməsini simulyasiya ediblər. Bununla yanaşı, terrorizmlə mübarizə və taktiki birgə fəaliyyət elementləri üzrə məşqlər də keçirilib.
Rəsmi açıqlamalara görə, təlimlərin məqsədi dəniz təhlükəsizliyinin gücləndirilməsi, beynəlxalq gəmiçiliyin qorunması və iki ölkə arasında hərbi əməkdaşlığın inkişafıdır.
17:25 19.02.2026
Oxunuş sayı: 670
