Zaxarova: Kiyev döyüş meydanındakı uğursuzluqları terror aktları ilə əvəz edir
Rusiya Xarici İşlər Nazirliyinin rəsmi nümayəndəsi Mariya Zaxarova bildirib ki, Ukrayna hakimiyyəti döyüş meydanında nəticə əldə edə bilmədiyini anlayaraq, bunu Rusiya ərazisində mülki əhali və mülki infrastruktura qarşı terror aktları ilə kompensasiya etməyə çalışır.
Crossmedia-az xəbər verir ki, Zaxarova bu fikirləri “Rossiya-1” telekanalında yayımlanan “Voskresnıy veçer s Vladimirom Solovyovım” proqramında səsləndirib. Onun sözlərinə görə, Rusiya tərəfi Kiyev tərəfindən həyata keçirildiyi iddia olunan bu cür hücumları uzun müddətdir hibrid müharibənin tərkib hissəsi kimi qiymətləndirir.
Diplomat qeyd edib ki, Ukrayna tərəfi hərbi əməliyyatlarda istədiyi nəticəni əldə edə bilmədiyini başa düşdüyü məqamlarda mülki obyektlərə və əhaliyə qarşı hücumlara əl atır. Zaxarovanın sözlərinə görə, bu cür addımların məqsədi ölkə daxilində sabitliyi pozmaq və müxtəlif sahələr üzrə təzyiq yaratmaqdır.
O həmçinin iddia edib ki, Rusiya tərəfinin fikrincə, Ukrayna hakimiyyəti Rusiyaya qarşı aparılan hibrid müharibədə alət kimi istifadə olunur və yüksək vəzifəli şəxslərə, dövlət strukturlarına, media nümayəndələrinə və ictimai xadimlərə qarşı hücum cəhdləri bu strategiyanın tərkib hissəsi kimi qiymətləndirilir.
19:25 08.02.2026
Oxunuş sayı: 423
