Almaniya “Sülh Şurası”nın beynəlxalq hüququ poza biləcəyindən narahatdır
Almaniya hakimiyyəti Qəzza ilə bağlı yaradılması müzakirə olunan “Sülh Şurası” təşəbbüsünün beynəlxalq hüquqa zidd nəticələr doğura biləcəyindən ciddi narahatlıq keçirir.
Crossmedia.az xəbər verir ki, bu barədə "Financial Times" yazıb.
Nəşrin məlumatına görə, Almaniya hökumətindəki yüksəkvəzifəli rəsmilərdən biri bildirib ki, Qəzza üzrə nəzərdə tutulan bu mexanizm “bizim bildiyimiz kimi beynəlxalq hüququn tabutunda son mismar ola bilər”. Rəsminin sözlərinə görə, mövcud beynəlxalq hüquqi çərçivədən kənar yaradılacaq yeni qurum qlobal hüquq sistemini zəiflədə və təhlükəli presedent yarada bilər.
FT qeyd edir ki, Berlində əsas narahatlıq yeni “Sülh Şurası”nın Birləşmiş Millətlər Təşkilatı kimi mövcud beynəlxalq institutları kənarda qoyması və münaqişələrin nizamlanmasında hüquqi legitimliyi sual altına alması ilə bağlıdır.
Almaniya tərəfi hesab edir ki, Qəzza böhranının həlli beynəlxalq hüquq normaları, BMT mexanizmləri və çoxtərəfli diplomatiya çərçivəsində aparılmalıdır. Əks halda, yeni təşəbbüslər qlobal nizam üçün uzunmüddətli risklər yarada bilər.
17:06 20.01.2026
Oxunuş sayı: 975
