Zelenski Davosdakı çıxışını ləğv etdi
Ukrayna Prezidenti Volodimir Zelenski bu gün İsveçrənin Davos şəhərində keçirilən Dünya İqtisadi Forumundakı çıxışını ləğv edib. Prezidentin ofisindən verilən açıqlamaya görə, gecə baş verən artilleriya atəşləri və təhlükəsizlik vəziyyətinin kəskin pisləşməsi səbəbindən Zelenski səfəri təxirə salaraq Kiyevdə qalmaq qərarına gəlib.
Crossmedia.az bu barədə xarici mediaya istinadən xəbər verir. Ukrayna rəhbərliyinin sözçüsü bildirib ki, Prezident ölkənin müdafiə vəziyyətini şəxsən izləməli və hərbi-siyasi qərarların qəbulunda iştirak etməlidir. Bu səbəbdən Davosdakı forumda planlaşdırılan görüşlər və çıxışlar təxirə salınıb.
Qeyd edək ki, Zelenski daha əvvəl forum çərçivəsində beynəlxalq biznes liderləri və dövlət başçıları ilə bir sıra ikitərəfli görüşlər keçirəcəyini elan etmişdi. Lakin indiki vəziyyətin təhlükəsizliyə təsiri ilə əlaqədar bu planlar icra olunmayacaq.
Ukrayna mediası xəbər verir ki, Prezident Kiyevdə qalmaqla həm də hərbi və diplomatik koordinasiyanı şəxsən yönəldəcək, beynəlxalq ictimaiyyətə ölkədəki vəziyyət barədə məlumat verməyə davam edəcək.
Sevinc Yarməmmədova
15:25 20.01.2026
Oxunuş sayı: 1320
