Suriya və Rusiyanın hava hücumları Türkiyə üçün miqrasiya təhlükəsi yaradıb
Suriyanın Hələb şəhərində Bəşər Əsəd rejimi qüvvələrinə qarşı irəliləyən müxalif qrupların hücumları və bunun ardınca Suriya-Rusiya cavab tədbirləri İdlib bölgəsində yeni humanitar böhran və Türkiyəyə köç dalğası riskini gündəmə gətirib.
Crossmedia.az xəbər verir ki, Hələbin qərbindən mərkəzə doğru irəliləyən rejim əleyhdarı silahlı qruplar bir müddət əvvəl Sədallah Əl-Cabiri meydanına çatıb. Bunun üzərinə Əsəd rejimi Rusiyadan hərbi dəstək istəyib və yardımın 72 saat ərzində gəlməsi gözlənilir.
Bu inkişaflara paralel olaraq Suriya və Rusiya döyüş təyyarələri də müxaliflərin ələ keçirdiyi İdlib nöqtələrinə intensiv hava zərbələri endirməyə başlayıb. Rejim təyyarələrinin hücumları nəticəsində 3 mülki vətəndaş həyatını itirib, ən azı 1 nəfər yaralanıb. Hücum zamanı hədəf alınan yanacaqdoldurma məntəqəsindəki yanğını söndürmək üçün "Ağ Dəbilqəlilər" qrupları işlərini davam etdirir.
İdlibdə 3,5 milyon insan yaşayır və BMT-nin məlumatına görə, bu əhalinin böyük hissəsi daxili miqrasiya nəticəsində didərgin düşmüş insanlardan ibarətdir. Ekspertlər xəbərdarlıq edir ki, davamlı hücumlar İdlibi xaosa sürükləyə və Türkiyə sərhədinə doğru yeni köç dalğasına səbəb ola bilər.
Türkiyənin xarici işlər naziri Hakan Fidan Türkiyənin Hələbdəki qarşıdurmalara qarışmadığını bəyan edərək, “Yeni köç dalğasına səbəb olacaq heç bir addım atmayacağıq” deyib.
Gültac Mehdizadə
13:27 30.11.2024
Oxunuş sayı: 18268
