Energetika

Azərbaycan nefti bahalaşıb: Perspektiv üçün nə vəd olunur?

Dünya bazarında "Azeri Light" markalı Azərbaycan neftinin 1 barelinin qiyməti 1,04 ABŞ dolları və ya 1,6 % artaraq 65,64 ABŞ dolları təşkil edib.

Hərracların nəticələrinə görə, "Brent" markalı neftin mart fyuçerslərinin qiyməti 62,93 ABŞ dolları təşkil edib.

Türkiyənin Ceyhan limanında FOB bazasında "Azeri Light" markalı Azərbaycan neftinin bir barelinin qiyməti 1,06 ABŞ dolları və ya 1,69 % artaraq 63,86 ABŞ dolları təşkil edib.

Azərbaycanın builki dövlət büdcəsində bir barel neftin orta qiyməti 65 ABŞ dollarından hesablanıb.

Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb. Azərbaycanda bu markadan olan neft "Azəri-Çıraq-Günəşli" (AÇG) yataqlar blokunun işlənməsi haqqında müqavilə çərçivəsində hasil edilir. Müqavilədə Azərbaycan Dövlət Neft Şirkətinin (SOCAR) payı 31,65 %-dir.

Müşahidə olunan dinamikanın Azərbaycan iqtisadiyyatına durumu barədə Crossmedia.az-a danışan neft məsələləri üzrə ekspert İlham Şaban deyib ki, gündəlik dəyişikliklər Azərbaycan üçün əsasən cari gəlirlərin miqdarına təsir edir: “Azərbaycan gündə təxminən 600 000 barel neft ixrac edir. Məsələn, dünənlə bu gün arasında 1 ABŞ dolları fərq olsa belə, bu, yalnız əvvəlki günə nisbətən daha çox gəlir deməkdir. Belə dəyişikliklər gündəlik bazar hadisələridir və ümumi iqtisadi perspektivə təsir etməz. Gələcək qiymət proqnozları üçün isə rüblük və illik qiymətlərə baxmaq daha məqsədəuyğundur. Gündəlik bazar dalğalanmaları böyük neft bazarları üçün normal haldır və iqtisadi stabilliyə ciddi təsir yaratmır”.

Ekspert əlavə edib ki, “Azeri Light” neftinin sabit istehsal həcmi və uzunmüddətli müqavilələr ölkənin neft gəlirlərini dayanıqlı edir və bazar dalğalanmalarından asılılığı minimuma endirir.

Fatimə Hacıəliyeva

🖨 Çap et

11:17 10.01.2026

Oxunuş sayı: 1695