Elm və Təhsil Nazirliyində Birləşmiş Nüvə Tədqiqatları İnstitutunun nümayəndə heyəti ilə görüş keçirilib
Birləşmiş Nüvə Tədqiqatları İnstitutunun (BNTİ) direktoru akademik Qriqori Trubnikovun rəhbərlik etdiyi nümayəndə heyəti Elm və Təhsil Nazirliyində olub.
Crossmedia.az AZƏRTAC-a istinadən xəbər verir ki, elm və təhsil nazirinin müavini Firudin Qurbanov ilə keçirilən görüş zamanı qonaqlara Azərbaycan təhsil sistemində aparılan islahatlar barədə məlumat verilib. BNTİ-nin nümayəndə heyətinin ölkəmizə səfəri çərçivəsində bir sıra elm və ali təhsil müəssisələrinin rəhbərləri ilə baş tutan görüşlərdə müzakirə edilən əməkdaşlıq perspektivlərindən danışılıb.
Akademik Qriqori Trubnikov 16 ölkənin üzv olduğu BNTİ-nin elmin müxtəlif istiqamətləri, xüsusilə nüvə və aerokosmik texnologiyaların inkişaf etdirilməsində nailiyyətlərini xüsusi vurğulayıb və institutda aparılan tədqiqatların elmi aktuallığını diqqətə çatdırıb.
Görüşün sonunda nazir müavini Firudin Qurbanov və akademik Qriqori Trubnikov qarşılıqlı əməkdaşlığın davam etdirilməsi istiqamətində birgə səylər göstəriləcəyini bir daha vurğulayıblar.
Qeyd edək ki, Azərbaycan BNTİ-yə üzv olduğu dövrdən nüvə fizikası sahəsindəki tədqiqatları bu beynəlxalq statuslu institutla, digər beynəlxalq qurumlarla, o cümlədən Avropa Nüvə Tədqiqatlar Mərkəzi (CERN) ilə qarşılıqlı əməkdaşlıq şəraitində həyata keçirib. Ətraf mühitin qorunması və radioekologiya sahəsində aparılmış tədqiqatlar, ölkəmiz üçün çox əhəmiyyətli tibbi müalicə üsulları (onkologiya və s.) sahəsində yüksək hazırlıqlı radioloqların hazırlanmasını buna misal olaraq göstərmək mümkündür.
13:06 26.11.2024
Oxunuş sayı: 9059
