Enerji sahəsində dayanıqlılıq: alternativ və ənənəvi yanaşmaların sintezində
Enerji sektorunda dayanıqlılıq və davamlı inkişaf, müasir dövrün ən vacib məsələlərindən biridir. Azərbaycanda iqtisadiyyatın şaxələndirilməsi və ətraf mühitin qorunması məqsədilə həm alternativ, həm də ənənəvi enerji mənbələrinin birgə təşkili mühüm əhəmiyyət kəsb edir. Bu mövzuda aparılan təhlillər və müzakirələr, enerji sektorunda gələcək addımların atılmasına işıq tutur.
Mövzu ilə bağlı iqtisadçı Elşad Məmmədova Crossmedia.az olaraq müraciət etdik:
“Mən hesab edirəm ki, davamlı və dayanıqlı inkişaf baxımından, həmçinin iqtisadiyyatın şaxələndirilməsi və ətraf mühitin qorunması ilə bağlı yanaşmaların tətbiqi ən azı yaxın onilliklərdə alternativ və ənənəvi elektrik enerjisi generasiyasının birgə təşkilini özündə ehtiva etməlidir. Əks halda, biz dayanıqlı və davamlı şəkildə fasiləsiz olaraq əlçatan şərtlərlə enerji resurslarına geniş əhali və biznes kateqoriyalarının çıxışını təmin edə bilmərik. Buna görə də alternativ generasiyanın artırılması vacibdir. Amma ənənəvi enerji istehsalından imtina etməməliyik. Əks halda sosial-iqtisadi baxımdan ciddi mənfi nəticələr qaçınılmaz olacaq”.
Elşad Məmmədovun fikirlərinə görə, alternativ generasiya fasiləsiz hesab oluna bilməz:
“Alternativ generasiya ilə bağlı unutmaq lazım deyil ki, bir məqam da ondan ibarətdir ki, alternativ generasiya hesabına yaranan elektrik enerjisinin nəql edilməsi də vacibdir. Onun istehlakçıya çatdırılması da lazımdır. Bütün bunlardan sonra bu enerjinin qiymətləri və ona aid olan tariflər ənənəvi generasiya ilə rəqabət apara bilmir. Buna görə də bu qiymətlərin və tariflərin kəskin artırılması səbəbi ola bilər. Sosial-iqtisadi fəsadları çox dərin ola bilər.
Eyni zamanda unutmaq lazım deyil ki, alternativ generasiya bir çox hallarda hava şəraitindən çox ciddi şəkildə asılı olur. O fasiləsiz olmalıdır və risk altında olmamalıdır. Bir məqam da var ki, alternativ enerji generasiyası son nəticədə əgər hava şəraiti uyğun olmursa, ənənəvi generasiyanın artırılmasını diqtə edir. Bax, bu cür məsələlər nəzərə alınmalıdır”.
Samirə Şərif
19:21 25.11.2024
Oxunuş sayı: 5755
