Məqsəd direktor vəzifəsinə idarəetmə qabiliyyəti yüksək olan mütəxəssislərin seçilməsidir - Ekspert
Müasir təhsil sistemi yalnız bilik ötürən deyil, eyni zamanda düşünən, araşdıran, təşəbbüskar və idarəetmə bacarıqlarına malik liderlər yetişdirən bir mühitə çevrilməlidir. Bu baxımdan, məktəb direktorlarının seçimi prosesi cəmiyyətin gələcəyinə yönəlik strateji qərarlardan biri kimi qiymətləndirilməlidir. Çünki məktəb sadəcə tədris müəssisəsi deyil — burada insan formalaşır, dəyərlər aşılanır, gələcək nəsil cəmiyyətin əsas dayağına çevrilir. Belə bir mühüm missiyanın uğuru isə birbaşa olaraq məktəbi idarə edən şəxsin peşəkarlığı, liderlik keyfiyyətləri və pedaqoji baxış bucağından asılıdır.
Bu kontekstdə məktəb direktorlarının yeni qaydalar əsasında seçilməsi qərarı həm təhsil sisteminin təkmilləşdirilməsi, həm də məktəblərdə idarəetmənin səmərəliliyinin artırılması baxımından məntiqli və zəruri addımdır. Məktəbəqədər və Ümumi Təhsil üzrə Dövlət Agentliyinin rəsmilərinin də qeyd etdiyi kimi, artıq dörd ildir uğurla həyata keçirilən sertifikatlaşdırma prosesi nəticəsində müəllimlərin bilik və bacarıqları obyektiv şəkildə ölçülür. Bu səbəbdən, direktor vəzifəsinə məhz yüksək nəticə göstərmiş, öz peşəkar hazırlığını sübut etmiş pedaqoqların seçilməsi həm ədalətli, həm də məqsədyönlü yanaşmadır.
Təhsil müəssisəsinin rəhbəri yalnız menecer deyil o, eyni zamanda pedaqoji prosesin mahiyyətini dərk edən, müəllim və şagird psixologiyasını anlayan, öyrətmə və öyrənmənin incəliklərinə bələd olan bir şəxs olmalıdır. Belə rəhbərin mövcudluğu məktəbdə həm nizam-intizamı, həm də qarşılıqlı etimadı möhkəmləndirir. Əks halda, qeyri-formal liderlik institutunun yaranması və rəhbərliklə pedaqoji heyət arasında gərginliyin artması qaçılmaz olur. Məhz buna görə də, yeni qaydalar pedaqoji nüfuza, peşəkarlığa və liderlik potensialına malik şəxslərin rəhbərliyə gətirilməsini təmin etməklə, məktəblərdə sağlam idarəetmə mühitinin formalaşmasına töhfə verəcək.
Beləliklə, bu yenilik təhsil sistemində keyfiyyətin yüksəldilməsi, şəffaflığın artırılması və məktəblərin idarəetmə mədəniyyətinin yenilənməsi istiqamətində mühüm mərhələ kimi dəyərləndirilə bilər.
Məsələ ilə bağlı təhsil üzrə ekspert Elçin Əfəndi Crossmedia.az-la öz fikirlərini bölüşüb: "Təhsil müəssisələrinin direktorlarının işə qəbul qaydalarında müəyyən yeniliklər tətbiq olunub. Artıq bu prosesdə imtahan mərhələsi deyil, əsasən müsahibə mərhələsi əsas götürülür. Namizədlərin seçimi onların əldə etdikləri uğurlar, fəaliyyət nəticələri və pedaqoji təcrübələri nəzərə alınmaqla həyata keçirilir.
Məsələn, direktor vəzifəsinə namizədin azı 5–10 il pedaqoji fəaliyyəti varsa, sertifikasiya imtahanında yüksək nəticə (minimum 1 bal üzərində) əldə edib və müəllimlərin işə qəbulu imtahanında da uğurlu göstəricilərə malikdirsə, o zaman həmin şəxs müsahibə mərhələsinə dəvət olunur.
Müsahibə zamanı namizədin ümumi idarəetmə bacarıqları, təşkilatçılıq qabiliyyəti və təhsil idarəçiliyi bilikləri qiymətləndirilir. Daha sonra həmin şəxs üçün sınaq müddəti müəyyən edilir. Bu müddət ərzində onun idarəetmə bacarığı, kollektivlə iş üslubu və qərarvermə qabiliyyəti təhlil olunur. Əgər nəticələr müsbət olarsa, namizəd vakant direktor vəzifəsinə rəsmi şəkildə təyin edilir.
Ümumilikdə məqsəd ondan ibarətdir ki, direktor vəzifəsinə idarəetmə qabiliyyəti yüksək olan mütəxəssislər seçilsin. Bu məqsədlə prosesə menecment, dövlət və bələdiyyə idarəetməsi ixtisası üzrə təhsilli şəxslər də cəlb olunur. Onlar xüsusi təlim və hazırlıq mərhələlərindən keçirlər".
Ekspert həmçinin hazırda təhsil müəssisələrində çalışan, fəaliyyətində fərqlənən və yüksək nəticə göstərən pedaqoqların da direktor vəzifəsinə namizəd kimi müəyyən təlim və treninglərə cəlb olunduğunu qeyd edib.
"Həmin hazırlıq mərhələlərini uğurla başa vuran şəxslərin mövcud vakant direktor yerlərinə təyin olunması məqsədəuyğun hesab edilir" - deyə o əlavə edib.
Elmir Heydərli
19:31 31.10.2025
Oxunuş sayı: 2629
