Nazir: SOCAR-la Qazaxıstanda “Dunqa” yatağı üzrə danışıqlar aktiv fazadadır
SOCAR-la Qazaxıstandakı “Dunqa” neft yatağı üzrə əməkdaşlıq danışıqları aktiv fazadadır.
Crossmedia.az xəbər verir ki, bu barədə Qazaxıstanın energetika naziri Yerlan Akkenjenov bildirib.
Onun sözlərinə görə, yatağın strateji əhəmiyyəti iki ölkə arasında enerji əməkdaşlığının yeni mərhələyə keçdiyini göstərir: “Dunqa” yatağı geoloji və texniki baxımdan olduqca əlverişlidir. Neftin tərkibi çox yaxşıdır – yüngüldür, az kükürdlüdür və emal üçün son dərəcə əlverişlidir. Bu, nadir hallarda rast gəlinən üstünlükdür”.
Nazir qeyd edib ki, hazırda yatağın inkişafı ilə bağlı konkret kommersiya danışıqları “KazMunayQaz” və SOCAR arasında aparılır: “Bu, kommersiya xarakterli bir razılaşmadır və biz Energetika Nazirliyi olaraq dövlət siyasətini həyata keçirən qurum kimi bu cür danışıqlara qarışmırıq. Əməkdaşlığın detalları yalnız “KazMunayQaz” və SOCAR arasında razılaşdırılır”.
Qeyd edək ki, “Dunqa” yatağı Manqistau vilayətində yerləşir və təxminən 106 milyon ton neft və 6 milyard kub metr qaz ehtiyatlarına malikdir. 1994-cü ildə bağlanmış istehsalın paylaşılması haqqında müqavilə əsasında istismar olunur. 2023-cü ildə “KazMunayQaz” şirkəti yataqdakı 60% payı alıb. Hazırda yataqda “Oman Oil” və “Partex Qazaxıstan” şirkətləri də 20 faiz payla iştirak edir.
Xatırladaq ki, SOCAR-ın bu layihəyə qoşulması Cənubi Qafqaz və Mərkəzi Asiya regionlarında enerji əməkdaşlığının dərinləşməsinə xidmət edə bilər.(Apa)
10:38 21.10.2025
Oxunuş sayı: 7698
