Xəbərdarlıq: Qiymətlər bahalaşa-bahalaşa gedəcək
Bu günlərdə bəzi avtobus marşrutlarında və metroda sərnişindaşıma
50 qəpikdən 60 qəpiyə qalxdı. Bəziləri bunun çox cüzi artım olduğunu əsaslandırmağa
çalışsalar da, əslində gündəlik 10 və ya 20 qəpik ictimaiyyəti nəqliyyatdan müntəzəm
istifadə edənlər üçün aylıq 5-6 manat deməkdir.
İctimai nəqliyyatda genişhaqqının artması və bunun yan təsirləri
haqqında iqtisadçı Fuad İbrahimov Crossmedia.az -a açıqlama verib.
Onun sözlərinə görə, yaxın günlərdə Bakı şəhərində nəqliyyat
vasitələrinin qiymət tarifinin 50 qəpikdən 60 qəpik artması sərnişin daşımanın
maya dəyəri ilə izah olunur, lakin ekspert vətəndaşların gəlirlərinin buna
uyğun olmadığını bildirir.
İqtisadçının fikrincə, əsas sərnişin kütləsi aşağı və orta gəlirli
təbəqələrdir.
"Məsələn, 400 manat və ya daha az maaş alan vətəndaşlar
gündəlik nəqliyyatdan 2–3 dəfə istifadə edir və bu artım onların büdcəsinə mənfi
təsir göstərir. Şəhərdəki tıxac problemləri də narahatlıq doğurur. Sadəcə
avtobus və velosiped zolaqları ilə avtomobillərin sıxlığını azaltmaq kifayət
etmir. Dünyanın bir çox inkişaf etmiş ölkələrində bu problemlə mübarizə aparmaq
üçün sərnişin nəqliyyatı iş günlərində pulsuz olur, Azərbaycanda isə əksinə,
qiymətlər artırılır və ailələr gündəlik xərclərini ödəməkdə çətinlik çəkirlər".
Eyni zamanda o bildirib ki, ölkədə qida məhsullarının qiymətləri
də artmaqdadır. Statistikaya görə, ərzaq məhsullarının 70–75%-i idxaldır:
"Dünya bazarlarında qiymətlərin qalxması Azərbaycanda da bahalaşmaya səbəb
olacaq, xüsusilə də inhisarlı yanaşma prosedurları da davam edərsə, qiymətlər
bahalaşa-bahalaşa gedəcək. Yeri gəlmişkən, yanacağın qiymətinin bahalaşması da
proqnozlaşdırılır. Məlumdur ki, dünya bazarlarında qiymətlər yüksək olduğu üçün
ölkədə də bu artımların davam edəcəyi gözlənilir".
İqtisadçı həmçinin minimum və orta əməkhaqqı arasındakı fərqin
vətəndaşların sosial rifahına təsirini də vurğulayıb. Onun fikrincə, minimum əməkhaqqı
orta əməkhaqqının 60–70%-i səviyyəsində olmalıdır ki, vətəndaşların
"dolanışıqlarına" müsbət təsir göstərsin.
Mehriban İbrahimli
21:56 02.10.2025
Oxunuş sayı: 7337
