ABŞ administrasiyası Myanma hərbi hökuməti ilə danışıqlara başlayıb
ABŞ Prezidenti Donald Trampın administrasiyası 2021-ci il çevrilişindən sonra Myanma hərbi hökumətini təcrid etmək siyasətindən geri çəkilərək onunla birbaşa danışıqlara başlayıb.
Crossmedia.az xəbər verir ki, “Reuters” bu barədə məlumat yayıb.
Məlumata görə, ABŞ-nin yüksək vəzifəli rəsmisi Maykl Vens sentyabrın 15-16-da Myanmanın lideri Min Aunq Hlaynqla görüşüb. Bu, 2021-ci il çevrilişindən sonra ABŞ ilə Myanma hərbi rəhbərliyi arasında ən yüksək səviyyəli təmas kimi qiymətləndirilir.
Danışıqların ilkin məqsədi saxlanılan amerikalı iş adamı Adam Kastilyonun azad edilməsinə nail olmaq olub. Daha sonra müzakirələrin əhatəsi genişlənərək kiberdələduzluq mərkəzləri ilə mübarizə və Myanmanın zəngin nadir torpaq elementləri yataqlarına çıxış məsələlərini də əhatə edib.
Vaşinqton nadir torpaq elementləri sahəsində Çindən asılılığını azaltmağa çalışır. Bu baxımdan Myanmanın mineral ehtiyatları ABŞ üçün strateji və iqtisadi əhəmiyyət daşıyır.
Min Aunq Hlaynq insan hüquqlarının pozulması ilə bağlı ABŞ sanksiyaları altında qalır. Tənqidçilər isə hesab edirlər ki, ABŞ-nin hərbi hökumətlə yaxınlaşması Myanma rəhbərliyinin legitimləşdirilməsi ilə nəticələnə bilər.
Bundan əlavə, Tramp administrasiyasının Myanmadakı demokratik müxalifəti dəstəkləyən ABŞ proqramlarının böyük hissəsini dayandırdığı bildirilir. Bu addımlar Vaşinqtonun Myanma siyasətində strateji və iqtisadi maraqlara əsaslanan yeni yanaşmaya keçdiyini göstərir.
16:20 08.10.2026
Oxunuş sayı: 181
