Sürücülük imtahanı verənlərin nəzərinə – YENİ QAYDALAR
Rusiyada 2027-ci ildən sürücülük vəsiqəsi almaq üçün keçirilən imtahanların qaydalarında mühüm dəyişikliklər qüvvəyə minəcək.
Crossmedia.az xəbər verir ki, bu barədə Ria Novosti məlumat yayıb.
Yeni qaydalara əsasən, 1 mart 2027-ci ildən nəzəri imtahan zamanı namizədlərin avtomatik fotoşəkli çəkiləcək. İmtahan zallarında isə səs və görüntü qeydiyyatı aparan cihazlar quraşdırılacaq. Sistem real vaxt rejimində səs və görüntü yazacaq.
Rusiya İctimai Palatasının Təhlükəsizlik və İctimai Nəzarət Komissiyaları ilə Qarşılıqlı Əlaqə Komissiyasının üzvü, avtomobil eksperti Aleksandr Xolodov bildirib ki, sistem icazəsiz girişdən qorunmalıdır. Həmçinin kamera kadrında imtahan nəzarətçilərinin və namizədlərin iş sahələri görünməlidir.
Ekspertin sözlərinə görə, fotoşəkil, səsli rabitə və elektron hesablama cihazlarından istifadə ilə bağlı qadağa artıq qüvvədədir. Lakin namizədin foto vasitəsilə identifikasiyası yalnız 1 mart 2027-ci ildən tətbiq olunacaq.
Qaydaların bəzi dəyişiklikləri isə artıq 12 may 2026-cı ildən qüvvədədir. Yeni tələblərə görə, nəzəri imtahanı uğurla keçən namizəd üçün praktiki imtahan ən geci 60 təqvim günü ərzində təyin edilməlidir.
Bu qaydanın məqsədi namizədlərin nəzəri imtahandan sonra praktiki mərhələ üçün uzun müddət gözləməsinin qarşısını almaqdır.
1 mart 2027-ci ildən tibbi arayışlarla bağlı qaydalar da dəyişəcək. Namizədin tibbi arayışı barədə məlumatlar vahid məlumat bazasında mövcuddursa, sənədin özünü əlavə təqdim etməyə ehtiyac olmayacaq.
Lakin imtahanlar zamanı tibbi arayışın etibarlılıq müddəti başa çatarsa, namizəd imtahanları tamamlaya biləcək. Buna baxmayaraq, yeni tibbi arayış təqdim edilmədən ona sürücülük vəsiqəsi verilməyəcək.
Xolodovun sözlərinə görə, yeni sistemin əsas məqsədi imtahanların təhlükəsizliyini artırmaq, qayda pozuntularının qarşısını almaq və prosesin şəffaflığını təmin etməkdir. Səs, görüntü və foto qeydiyyatı mümkün mübahisələr zamanı imtahan prosesinin daha obyektiv qiymətləndirilməsinə də imkan verəcək.
14:29 08.10.2026
Oxunuş sayı: 49
