Yeni tikililərdə qiymətlər 60 faiz bahalaşıb – Ekspert
Əslində bünövrə səviyyəsində – yəni binanın tikilən dövründəki qiymətlərlə, tam təhvil verilmiş və çıxarışla təmin olunmuş binanın qiymətləri arasında həmişə fərq olub. Bu normaldır və ölkədəki iqtisadi artım, devalvasiya, həmçinin vətəndaşların mərhələli ödəniş etmə imkanları ilə bağlıdır. Bir çox vətəndaş ilkin ödəniş etdikdən sonra tikinti dövründə hissə-hissə ödəməyə üstünlük verir. Bu həm investisiya, həm də ev sahibi olmaq baxımından geniş istifadə olunan üsuldur.
Bu sözləri Crossmedia.az-a açıqlamasında daşınmaz əmlak eksperti Elnur Azadov bildirib.
Onun sözlərinə görə, mənzil alarkən risklərə qarşı diqqətli olmaq vacibdir:
“Əsas məsələ budur ki, vətəndaşlar yalnız etibarlı və tanınmış tikinti şirkətləri ilə işləsinlər. Müqavilələr hüquqşünas və ya vəkillə məsləhətləşilərək imzalanmalıdır. Ödənişlər heç vaxt nağd şəkildə edilməməli, yalnız rəsmi bank köçürmələri ilə həyata keçirilməlidir. Mənzil alarkən mütləq cizgi planı təqdim olunmalı, sahə isə qanunvericiliyin tələb etdiyi kimi ‘içdən içə’ hesablanmalıdır”.
Ekspertin sözlərinə görə, hazırda Bakıda yeni tikililərdə mənzillərin kvadratmetr qiyməti şəhər kənarından başlayaraq təxminən 1500 manatdan hesablanır:
“Şəhərin mərkəzi və dənizkənarı zonalarda qiymətlər 14–15 min dollara qədər yüksəlir. Məsələn, Crystal, Bakı Ağşəhər və Nardaran ‘Caspian Dreamliner’ layihələrində 1 kvadratmetr üçün qiymət 14 min dollara qədər çatır”.
Azadov bildirib ki, 2020-ci ildən – xüsusilə pandemiyadan sonra mənzil bazarında ciddi bahalaşma qeydə alınıb:
“Statistikaya görə, bu dövrdə qiymətlər 60%-ə qədər artıb və proses hələ də davam edir. Bunun əsas səbəblərindən biri də rəqabətin azalmasıdır. Tikinti və Şəhərsalma Komitəsi 2001-ci ildən icazələri məhdudlaşdırıb və bu günə qədər məhdudiyyət hələdə aradan qaldırılmayıb. Bu da bazarda qiymət artımına gətirib çıxarıb”.
Ekspert əlavə edib ki, son illərdə armatur və digər tikinti materiallarının bahalaşması da qiymətlərə təsir göstərib. Bu artım Qarabağ iqtisadi zonasında aparılan genişmiqyaslı inşaat işləri ilə bağlıdır.
“Yalnız tikinti şirkətlərinə qoyulan məhdudiyyətlər aradan qaldırıldıqdan və bazara daha çox layihə çıxarıldıqdan sonra qiymətlərin stabilləşməsi mümkündür. Mənim fikrimcə, bu proses ən azı bir ildən tez baş verməyəcək”, – Azadov vurğulayıb.
Nihat Tahirov
15:10 23.09.2025
Oxunuş sayı: 1049
