Qarabağ bölgəsində “Uşaq İncəsənət Festivalı – 2025”in ikinci mərhələsi üzrə seçimlər davam edir
Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkilatçılığı ilə “Uşaq İncəsənət Festivalı – 2025”in ikinci mərhələsi üzrə seçimlər Qarabağ bölgəsində uğurla davam edir.
Crossmedia.az xəbər verir ki, festival Qarabağ regionunda 24
nominasiya üzrə 644 məktəblini əhatə edir. Uşaq İncəsənət Festivalının ikinci mərhələsi
üzrə seçimlər Ağcabədi şəhər Üzeyir Hacıbəyli adına Uşaq İncəsənət Məktəbində
keçirilir.
Festivalın seçim turunda bölgənin bütün rayonlarından müxtəlif
yaş qrupunda iştirakçılarla qarşılaşmaq mümkündür. Ağcabədi uşaq incəsənət məktəbinin
2-ci sinfində təhsil alan Fidan Namazova festivalın seçim mərhələsinə böyük həvəslə
qatıldığını bildirib: “Çox hazırlaşsam da, bir qədər həyəcanlıyam. İnanıram ki,
növbəti mərhələyə keçə biləcəyəm”.
“Uşaq İncəsənət Festivalı – 2025”in ikinci mərhələsi üzrə
seçimlərdə ən çox nümayəndə ilə iştirak edənlər sırasında Bərdə rayonu da var.
Bərdə Uşaq İncəsənət Məktəbinin nümayəndəsi Ləman Həsənova sözlərinə görə,
builki seçim turlarına 100-dən çox şagird qatılıb.
Münsiflər heyətinin üzvü Məhbubə Əliyeva bildirib ki,
festival uşaqların gələcək həyatında böyük rol oynayacaq. Bütün iştirakçılar
festivala çox böyük həvəs və məsuliyyətlə hazırlaşıblar.
Hər bir iştirakçıya çıxışlarının cavabları elektron qaydada
portal vasitəsi ilə yönləndirilir. Qarabağ bölgəsi üzrə festivalın II mərhələsinin
seçim turları avqustun 25-dək davam edəcək.
22:55 15.08.2025
Oxunuş sayı: 896
