ABŞ səfirliyində qalmaqal: İsrail hökumətini qorumaq üçün hesabatlar dəyişdirilib?
ABŞ-ın İsraildəki səfirliyində yüksək vəzifəli diplomatın İsrail Baş naziri Benyamin Netanyahunun hökumətinə qarşı Vaşinqtonda mümkün tənqidin qarşısını almaq məqsədilə daxili diplomatik hesabatları sistemli şəkildə gecikdirdiyi, dəyişdirdiyi və yenidən yazdığı iddia edilib.
Crossmedia.az xəbər verir ki, “The New York Times”ın araşdırmasına görə, 2025-ci ilin aprelindən ABŞ-ın İsraildəki səfirliyində səfir Mayk Hakabinin əsas köməkçisi kimi çalışan Devid Milsteyn yüksək səviyyəli siyasətçilərə göndərilməsi nəzərdə tutulan bir sıra diplomatik qiymətləndirmələrə müdaxilə edib.
Araşdırmada bildirilir ki, mart ayında İsrailin işğal altındakı Qərb sahilində yaşayış məntəqələrinin genişləndirilməsinə dair qərarından sonra səfirlik əməkdaşları bunun ABŞ Prezidenti Donald Trampın ilhaqla bağlı “qırmızı xətt”ini poza biləcəyi barədə xəbərdarlıq hazırlayıblar. İddialara görə, Milsteyn sənədin göndərilməsinin qarşısını alıb və onun məzmununu dəyişdirib.
Həmçinin Qərb sahilində israilli məskunlaşanların zorakılığı ilə bağlı diplomatik məlumatların dəyişdirildiyi iddia olunur. Araşdırmaya əsasən, İsrail hərbçilərinin mümkün genişmiqyaslı fələstinli üsyanı ilə bağlı xəbərdarlıqları da ilkin formada Vaşinqtona çatdırılmayıb.
Milsteynə həmçinin İsrail qüvvələri və məskunlaşanlar tərəfindən öldürüldüyü bildirilən doqquz fələstinli ABŞ vətəndaşı ilə bağlı araşdırmanın nəticələrinin dəyişdirilməsi və ABŞ Konqresinin sorğularına təsir göstərilməsi iddiası yönəldilib.
Bundan başqa, ABŞ-ın dəstəklədiyi Qəzza Humanitar Fondu tərəfindən yardım paylanması ilə bağlı diplomatik hesabatlarda əməliyyatların “uğurlu” göstərilməsi üçün bəzi tənqidi qiymətləndirmələrin çıxarıldığı bildirilir.
Araşdırmaya görə, bu müdaxilələr nəticəsində səfirliyin Fələstin məsələləri üzrə bölməsindən göndərilən hesabatların sayı həftədə bir neçə sənəddən ayda bir neçə sənədə qədər azalıb. Bəzi əməkdaşların isə sahədəki məlumatları rəsmi kanallardan kənar yollarla əldə etməyə çalışdığı qeyd olunur.
ABŞ-ın İsraildəki səfiri Mayk Hakabi isə iddiaları rədd edərək “The New York Times”ın araşdırmasının faktlardan məhrum olduğunu bildirib. ABŞ Dövlət Departamenti də əməkdaşlarının administrasiyanın xarici siyasət prioritetlərini həyata keçirməyə fokuslandığını açıqlayıb.
02:32 09.10.2026
Oxunuş sayı: 52
