Rusiya Cənubi Qafqaza müdaxiləyə hazırlaşır?: Bu, onun üçün faciəvi olar
Vaşinqtonda ABŞ, Azərbaycan və Ermənistan liderlərinin sammitindən sonra Rusiya təbliğatı Azərbaycana və onun rəhbərliyinə qarşı təhqir və hədələrlə dolu açıqlamalar səsləndirib. Bu barədə "Baku TV" reportaj hazırlayıb. Belə ki, Rusiyalı teleaparıcı Vladimir Solovyov Xəzər dənizi hövzəsində NATO bazasının yerləşdirilməsi ehtimalı ilə bağlı narahatlığını ifadə edib və yeni “xüsusi hərbi əməliyyat” keçirməyə çağırıb. Bu açıqlamalar Rusiyanın hakimiyyət strukturlarına yaxın şəxslərin məqsədyönlü şəkildə gərginlik yaratmağa çalışdığını göstərir. Eyni zamanda, Rusiya diplomatik səylərini artırmalı, xüsusilə AZAL təyyarəsinin vurulması ilə bağlı səhvlərini düzəltmək üçün addımlar atmalı olduğu vurğulanır. Bu arada, Azərbaycan Prezidenti İlham Əliyevin liderliyi ilə beynəlxalq münasibətlərdə uğurla irəliləyir, Vaşinqtonda imzalanmış sazişlərlə regionda iqtisadi və siyasi üstünlüklər qazanır. Rusiyanın təhdidlərinə baxmayaraq, Azərbaycan Zəngəzur dəhlizi kimi strateji layihələrlə regional liderliyini gücləndirir.
Səslənən iddialar barədə Crossmedia.az-a danışan siyasi şərhçi Kənan Novruzov Crossmedia.az-a açıqlama verib:
“Ümumiyyətlə müxtəlif regionlarda o cümlədən Cənubi Qafqazda baş verən hadisələr fonunda ikitərəfli əlaqələrdə də müəyyən dəyişikliklər müşahidə olunmaqdadır. Necə oldu ki, Azərbaycanla Ermənistan məhz ABŞ-da razılığa gəldilər? Məsələ burasındadır ki, ABŞ Rusiyanın Azərbaycana və Ermənistana qarşı təzyiqlərindən ustalıqla istifadə və yaranan boşluğu doldurdu. Azərbaycan və Ermənistana təzyiq edənə qədər Cənubi Qafqazda Rusiyanın təsir imkanları daha çox idi. Əslində Zəngəzur dəhlizinə Moskva nəarət edə bilərdi. Bu, 10 noyabr 2020-ci il bəyanatında öz əksini tapmışdı. Ancaq Rusiya Azərbaycan və Ermənistana qarşı təzyiq göstərərək səhvə yol verdi. Hər iki tərəf ondan uzaqlaşdı, ABŞ də bundan istifadə etdi. İndiki vəziyyət Rusiyanı qıcıqlandırır və narahat edir. Bir tərəfdən Cənubi Qafqazda sıxışdırılmaqdan, digər tərəfdən də Azərbaycan və Ermənistanın onun təsir dairəsindən çıxmasından narahatdır və bunu qəbul edə bilmir. O baxımdan perspektivdə Moskvanın həm İrəvana, həm də Bakıya təzyiqləri artacaq. Qeyd edim ki, Azərbaycanın Ukraynadan keçən qaz kəmərini vurması da Rusiyanın aqressivliyinin təzahürü kimi qiymətləndirir. Ondan qabaq Azərbaycan Hava Yollarına məxsus təyyarənin vurulması, Yekatenburqda və digər şəhərlərdə azərbaycanlılara qarşı təzyiqlər, Ermənistanda dini müxalifətin ayağa qaldırılması Rusiyanım aqressivliyinin təzahürüdür. Düşünürəm ki, Rusiya gələcəkdə də hər iki qonşusuna təzyiqləri artırmağa çalışacaq. Nəzərə almaq lazımdır ki, Rusiya Ukraynada artıq bataqlığa düşüb. Bunun fonunda daxili ictimai rəyi çaşdırmaqdan, məğlubiyyət fikirlərini ört- basdır etmək üçün süni şəkildə gərginliklər yaratmaqla "bizim düşmənlərimiz çoxdur" düşüncəsini yaratmağa çalışacaq. Hərçənd ki, Azərbaycan heç vaxt heç bir dövlətlə xüsusən də Rusiya ilə düşmənlik etməyib. Rusiya və Azərbaycanın çox yaxşı münasibətləri olub və hətta bizim strateji müttəfiqliyimiz də var. Odur ki, itirən Moskva oldu".
Müsahibimiz söyləyib ki, Rusiyanın təzyiqləri müxtəlif istiqamətlər üzrə arta bilər: "Bu, özünü informasiya müharibəsində, kibertəhlükəsizlk sahəsində göstərə bilər. Rusiya boş- boş bəyanatlar verəcək. Nəzərə almaq lazımdır ki, artıq ABŞ Cənubi Qafqazdadır. Üstəlik, Cənubi Qafqazda Azərbaycanın daha bir strateji müttəfiqi - Türkiyə var. Bu baxımdan Rusiyanın səsləndirdiyi mənasız təhdidlərin əməldə özünü göstərəcəyinə inanmıram. Rusiyanın Cənubi Qafqaza müdaxilə edəcəyini düşünmürəm. Bu Rusiyanın sonu olar. Amma ABŞ Rusiyanı buna çəkə də bilər. Düşünürəm ki, təxribatlar artsa da, bu, "əsəb oyunundan" o tərəfə keçməyəcək. Rusiya mənasız bəyanatlarla kifayətlənməli olacaq”.
Ayhan
12:47 12.08.2025
Oxunuş sayı: 909
