ABŞ-də atışma: polis evdə bir neçə nəfərin meyitini aşkarlayıb
ABŞ-nin Pensilvaniya ştatının İri şəhərində baş verən silahlı insident nəticəsində azı 9 nəfər öldürülüb. Ölənlər arasında iki uşağın da olduğu bildirilir.
Crossmedia.az xəbər verir ki, “CBS” telekanalı hadisə barədə məlumat yayıb.
Məlumata görə, polis yerli vaxtla saat 17:00 radələrində atışma barədə məlumat aldıqdan sonra hadisə yerinə gəlib. Ehtimal olunan atəş açanın yaşadığı evin yaxınlığında iki qadının meyiti aşkarlanıb. Daha bir neçə nəfərin, o cümlədən iki uşağın cəsədi isə evin daxilində tapılıb.
Polisin məlumatına görə, şübhəli şəxs hüquq-mühafizə orqanlarının əməkdaşları binaya daxil ola bilməmişdən əvvəl intihar edib.
Hazırda ictimai təhlükəsizliyə təhdidin olmadığı bildirilib. Hadisə ilə bağlı araşdırma başlanıb. İnsidentin digər təfərrüatları hələlik açıqlanmayıb.
18:59 10.10.2026
Oxunuş sayı: 55
