Türkiyə ilk dəfə PUSU hava hücumundan müdafiə sistemini sınaqdan keçirdi
Türkiyənin müdafiə sənayesinə məxsus Roketsan şirkəti PUSU adlı hava hücumundan müdafiə sisteminin ilk sınağını uğurla həyata keçirib.
Crossmedia.az xəbər verir ki, bu barədə SavunmaSanayiST.com sosial şəbəkədə məlumat yayıb.
Bildirilir ki, sınaq zamanı lazerlə idarə olunan CİRİT raketi yüksək dəqiqliklə hədəfi məhv edib və bu, sistemin real döyüş şəraitində effektivliyini sübut edib.
PUSU silah sistemi arxa hissəsində buraxılışa hazır vəziyyətdə olan dörd ədəd CİRİT raketi daşıyır. Bu raketlərin uçuş məsafəsi 8 kilometrdir və idarəetmə elektron-optik nişangah sistemləri vasitəsilə həyata keçirilir. Sistemə ön hissədə yerləşdirilmiş KARAKURT optoelektron modulu inteqrasiya olunub ki, bu da CİRİT raketlərinin buraxılışını təmin edir. Həmçinin, hava hücumundan müdafiə sisteminə AFAAR tipli radar da əlavə edilib.
Asimmetrik münaqişə zonalarında yüksək effektivlik üçün hazırlanmış PUSU, daşıma rahatlığı və operativ döyüş vəziyyətinə gətirilməsi ilə seçilir. Lazer hədəfləmə sistemi isə başqa platformadan və ya ön cəbhədə xüsusi təyinatlı bölmələr tərəfindən idarə oluna bilər.
Xumar Emilqızı
20:55 01.08.2025
Oxunuş sayı: 5532
