Rəşad Məcid: "Mətbuatın 150 illiyində cənab Prezidentin bu sözlərini təbrik kimi qəbul edirəm"
Azərbaycan Prezidentinin köməkçisi − Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev III Şuşa Qlobal Media Forumunun ikinci günündə deyib ki, 44 günlük müharibə dövründə Azərbaycan kütləvi dezinformasiyalara məruz qaldı.
O qeyd edib ki, azərbaycanlı jurnalistlər və Azərbaycan xalqı həm də bu yalan məlumatlarla mübarizə aparırdı:
“Azərbaycana qarşı dezinformasiya dalğaları olur. Bəşəriyyət olaraq bizim sosial medianı idarə edə bilməməyimiz böyük bir savaşdır. Tənzimləmə haqqında danışanda dərhal buna qarşı əksarqumentlər irəli sürülür. Ancaq hazırda süni zəkada tənzimləmələrlə bağlı beynəlxalq əməkdaşlıq və tərəfdaşlığa ehtiyac duyulur”.
O qeyd edib ki, bu informasiya hücumunun kulminasiyası 44 günlük Vətən müharibəsi oldu:
"Biz Azərbaycana qarşı geniş miqyaslı dezinformasiya kampaniyalarının şahidi olduq. Lakin Azərbaycan jurnalistləri və kütləvi informasiya vasitələri təkcə dəqiq faktlar və məlumatlar təqdim etmirdilər - onlar Azərbaycana və onun xalqına qarşı qurulmuş bütün yalan sistemini dağıtmaq uğrunda mübarizə aparırdılar. Məmnuniyyətlə qeyd edirəm ki, peşəkarlıq, birlik və beynəlxalq əməkdaşlıq sayəsində biz bu informasiya mübarizəsində uğur qazana bildik", - deyə Hacıyev vurğulayıb.
Hikmət Hacıyevin səsləndirdiyi fikirlər barədə Crossmediaz.a danışan Mətbuat Şurasının sədri Rəşad Məcid Azərbaycan mətbuatının 44 günlük müharibədəki sınaqdan uğurla çıxdığını diqqətə çatdırıb: "Azərbaycan Prezidentinin mətbuatımızın 150 illik yubileyi ilə bağlı imzaladığı Sərəncamda qeyd olunub ki, Müharibə dövründə mediamız əsl vətənpərvərlik, həmrəylik nümunəsi ortaya qoymuş, haqq səsimizin dünya ictimaiyyətinə çatdırılması, düşmənin və onun havadarlarının saxta məlumatlarının ifşası üçün xüsusi səy göstərmiş, Milli Ordumuzun, əsgər və zabitlərimizin rəşadəti, qəhrəmanlığı ilə bağlı zəngin salnamə yaratmışdır. Həmin sərəncamda da göründüyü kimi, Vətən müharibəsi zamanı Azərbaycan mətbuatının fəaliyyəti yüksək qiymətləndirilib. Cənab Prezident bu barədə fikirlərini Qlobal Media Forumunun açılışında da ifadə etdi. Bildirildi ki, dezinformasiya kampaniyaları təbii olsa da, Azərbaycan mətbuatı bəzən hətta hücum mövqeyində olaraq bu cəhdlərin qarşısını aldı. Mətbuatın 150 illiyində cənab Prezidentin bu sözlərini minnətdarlıq və təbrik kimi qəbul edirəm".
Kənan Novruzov
13:53 21.07.2025
Oxunuş sayı: 1286
