Təhsildə süni intellektdən istifadə hansı imkanları yarada bilər?
Son illər dünyada texnoloji inkişafın əsas istiqamətlərindən biri kimi süni intellektin rolu daha da ön plana çıxıb. Bu sahədə aparılan tədqiqatlar və tətbiq olunan yeniliklər bir çox sahələrdə, xüsusilə də təhsil, səhiyyə və sənaye sektorlarında ciddi dəyişikliklərə səbəb olub. Müasir dövrdə rəqabətə davamlı və innovativ cəmiyyətin formalaşdırılması üçün süni intellekt texnologiyalarının düzgün və məqsədyönlü istifadəsi vacib şərtlərdən birinə çevrilib. Xüsusən təhsil sahəsində süni intellektden istifadə daha geniş imkanlar yaradıb. Bəs Azərbaycanda təhsildə süni intellektden istifadə həyata keçirilirmi? Gələcəkdə keçirilməsi nəzərdə tutulubmu?
Mövzu ilə bağlı təhsil eksperti Elçin Əfəndiyev Crossmedia.az-a açıqlama verib:
"Süni intellekt istifadəsi artıq dünya ölkələrində geniş şəkildə tətbiq olunmağa başlanılıb. Ölkəmizdə də bu yaxınlarda dövlət başçısının müvafiq sərəncamı əsasında Süni İntellekt Mərkəzi yaradıldı. Bundan öncə isə bir sıra universitetlərdə magistr pilləsində süni intellekt ixtisası açılmış və tədrisinə başlanılmışdı. Düşünürəm ki, məhz bu ixtisasda təhsil alan gəncləri tədricən prosesə cəlb etməklə, artıq təhsil istiqamətində süni intellekt imkanlarından maksimum faydalana bilərik. Süni intellektdən istifadə edilməsi gələcəkdə həm təhsil verənlər, həm də təhsil alanlar üçün geniş imkanlar yaradacaq. Düzdür, süni intellektdən istifadə zamanı bəzən təhsil alanlar elmi işlərini məhz süni intellekt vasitəsilə həll edirlər. Bunun da aradan qaldırılması və araşdırılması üçün qiymətləndirmə həyata keçirən qurum fəaliyyət göstərməlidir. Məhz Süni İntellekt Mərkəzinin fəaliyyətə başlamasından sonra biz bir çox sahələrdə süni intellektin imkanlarından istifadə edə biləcəyik".
Ayhan
09:33 29.06.2025
Oxunuş sayı: 802
