Azərbaycan uğurlu ailə və qadın siyasəti reallaşdıran ölkədir - Deputat
Qadınların cəmiyyətdəki mövqeyinin gücləndirilməsi və ailə institutunun möhkəmləndirilməsi müasir dövrdə mühüm əhəmiyyət kəsb edir. Bakıda keçirilən Türk Dövlətləri Təşkilatının ikinci iclası bu məsələlərin dərinləşdirilmiş müzakirəsinə imkan yaradıb və dayanıqlı inkişafla ənənəvi dəyərlərin vəhdətinin önəmini ön plana çıxarıb. Cənab Prezident İlham Əliyev iclas iştirakçılarına ünvanladığı müraciətində qadınların cəmiyyətin inkişafında mühüm rol oynadığını vurğulayaraq, ailə institutunun qorunmasının və möhkəmləndirilməsinin əhəmiyyətini qeyd edib. Prezidentin müraciətini Azərbaycan Prezidenti Administrasiyasının humanitar siyasət məsələləri şöbəsinin müdiri Fərəh Əliyeva səsləndirib.
Müraciətdə qeyd edilib ki, bütün şanlı keçmişimiz boyunca qadınlar həm ailənin mənəvi dayağı olmuş, həm Vətənin müdafiəsini özlərinin müqəddəs vəzifəsi bilmiş, həm də yüksək ictimai mövqelər qazanaraq cəmiyyətin tərəqqisinə töhfə vermişlər. Müştərək əxlaqi sərvətlər xəzinəmizin yaşadılmasında qadınların müstəsna xidməti vardır. Qlobal çağırışlar fonunda ailə institutunun möhkəmləndirilməsi və sosial siyasət sahəsində əməkdaşlığın genişləndirilməsi ölkələr arasında birgə fəaliyyət üçün yeni imkanlar yaradır. Azərbaycan qadınların hüquqlarının təmin edilməsi və onların ictimai həyatın müxtəlif sahələrində fəal iştirakının artırılması istiqamətində ardıcıl siyasət həyata keçirir. Ölkəmizdə qadınlar öz mədəni-elmi potensialları ilə ictimai-siyasi proseslərdə yaxından iştirak edir, dövlət qurumlarında layiqincə təmsil olunurlar.
Mövzu ilə bağlı Crossmedia.az-a açıqlama verən Milli Məclisin deputatı Könül Nurullayeva ilk olaraq bildirib ki, Türk Dövlətləri Təşkilatına üzv ölkələrin müvafiq institutları arasında səmərəli işbirliyi mövcuddur:
“Türk xalqları arasında əməkdaşlığı daha da gücləndirmək üçün Türk Akademiyası, Beynəlxalq Türk Mədəniyyəti Təşkilatı (TÜRKSOY), Türk Mədəniyyəti və İrsi Fondu, Türk Dövlətlərinin Parlament Assambleyası (TÜRKPA) çərçivəsində əməkdaşlıq davam edir. Üzv ölkələr həmçinin ailə institutları arasında da əlaqələri dərinləşdirməkdədir. TDT-nin ailə məsələləri və sosial siyasət sahəsinə məsul nazirlərinin və qurum rəhbərlərinin “Müasir cəmiyyətdə qadının rolu: dayanıqlı inkişaf və ənənəvi dəyərlər” mövzusunda ikinci iclası da bu mənada uğurlu platformadır. Azərbaycan Prezidentinin toplantı iştirakçılarına ünvanladığı təbrik məktubunda da deyildiyi kimi, müştərək əxlaqi sərvətlər xəzinəmizin yaşadılmasında qadınların müstəsna xidməti var və hazırkı qlobal çağırışlar dövründə TDT miqyasında ailə məsələləri, sosial siyasət sahəsində əlaqələrin dərinləşdirilməsi ölkələrimizdə ailə institutunun qorunması və gücləndirilməsi baxımından böyük əhəmiyyət daşıyır. Həqiqətən də güclü ailə, güclü cəmiyyət deməkdir”.
K.Nurullayeva vurğulayıb ki, türk dünyası hər zaman milli-mənəvi dəyərlərə sadiq olub:
“Ailə dəyərləri hər bir xalqın milli adət-ənənələri ilə sıx bağlıdır. Onların sıx əlaqəsi əsrlər boyu dünya sivilizasiyasının sosial inkişafına töhfə verib. Tarixi, ənənələri, dili və mədəniyyəti ilə dərin bağlı olan üzv dövlətlərimiz qarşılıqlı əməkdaşlığı gücləndirməklə yanaşı, qlobal çağırışların aradan qaldırılması istiqamətində mühüm addımlar atır. Bu gün dünyada milli dəyərlərin kəskin şəkildə deqradasiyaya uğradığı bir vaxtda Azərbaycan həm də uğurlu ailə və qadın siyasəti reallaşdıran ölkə kimi TDT-nin ən fəal üzvlərindəndir. Ölkəmizdə gender bərabərliyinin bərqərar olması, ailə institutunun gücləndirilməsi üçün zəruri qanunvericilik və institusional əsaslar mövcuddur ki, bu da qardaş ölkələrlə təcrübə mübadiləsi üçün əlverişli imkanlar yaradır. Bu cür toplantılar qadın və ailə ilə bağlı siyasət sahəsində türk xalqları arasında ortaq dəyərlər üzrə əməkdaşlığı gücləndirmək baxımından vacibdir. Üzv ölkələr bu toplantılar vasitəsilə birgə layihələr və təlim proqramlarını müzakirə edirlər. Həmçinin, qadınların sosial-iqtisadi rolunun artırılması, ənənəvi dəyərlərin qorunması, ailələrin rəqəmsallaşma ilə bağlı qlobal təhlükələrdən qorunması məsələləri də gündəmdə olub. Bakı toplantısında türk dünyasının ortaq dəyərlərindən biri olan ailəni qorumağın və gələcək nəsillərə daşımağın vacibliyi bir daha diqqətə çatdırılıb. Hesab edirəm ki, bu cür müzakirələr TDT-yə üzv bütün qardaş ölkələr üçün real nəticələr verəcək”.
Nəzrin Salmanova
18:50 12.06.2025
Oxunuş sayı: 1475
