Kolumbiya ilk dəfə Fələstinə səfir təyin etdi
Kolumbiya Prezidenti Qustavo Petro hökuməti Fələstin dövlətinə ilk səfir təyin edib. Bu vəzifəyə Xorxe İvan Ospina gətirilib. O, daha əvvəl ölkənin üçüncü böyük şəhəri olan Kalinin şəhər rəhbəri olub.
Crossmedia.az xarici mediaya istinadən bildirir ki, Ospina səfir təyinatından sonra verdiyi açıqlamada Fələstin xalqının yaşadığı faciələrə diqqət çəkib. O, “bu gün Fələstin xalqının üzləşdiyi soyqırımı pislədiyini” bildirib və orada yaşayan insanların azadlığı uğrunda çalışacağını deyib. Yeni səfir ümid etdiyini bildirib ki, “Ramallaha ən qısa zamanda yollanacaq”.
Qeyd edək ki, Kolumbiya Prezidenti Qustavo Petro 1 may 2024-cü ildə İsrail hökuməti ilə diplomatik münasibətləri kəsdiyini açıqlamışdı. Bu addım İsrailin Qəzzadakı hərbi əməliyyatlarına etiraz olaraq atılmışdı.
Kolumbiya hökumətinin bu qərarı beynəlxalq aləmdə geniş rezonans doğurub. Analitiklər bu addımı Latın Amerikasında Fələstinə artan dəstəyin göstəricisi kimi dəyərləndirirlər. Ekspertlər hesab edirlər ki, Xorxe Ospinanın səfir təyin olunması Kolumbiyanın Yaxın Şərqdə daha aktiv siyasi mövqe tutmağa başladığını göstərir.
Fatimə Nəbiyeva
10:26 28.05.2025
Oxunuş sayı: 7527
