Cəmiyyət
Azərbaycan–Laos iqtisadi əməkdaşlığında hansı imkanlar var? – Deputat açıqladı
Azərbaycan Respublikasının xarici siyasətində Cənub-Şərqi Asiya ölkələri və ASEAN regionu ilə münasibətlərin şaxələndirilməsi prioriteti keyfiyyətcə yeni mərhələyə qədəm qoyur. Bu xüsusda Azərbaycan ilə Laos Xalq Demokratik Respublikası arasında 1995-ci ilin mayında əsası qoyulmuş diplomatik münasibətlər hazırda mühüm praktiki məzmunla zənginləşməkdədir. Laos Prezidenti Thonqlun Sisulitin ölkəmizə reallaşan ilk rəsmi səfəri və Prezident İlham Əliyevlə keçirilən Ali səviyyəli görüş ikitərəfli əlaqələrin gələcək inkişaf kursunu aydın şəkildə müəyyən etdi. Dövlət başçımızın bəyan etdiyi kimi, siyasi müstəvidə formalaşan çoxillik dostluq və qarşılıqlı etimad mühiti iqtisadi-ticarət tərəfdaşlığının da analoji səviyyəyə qaldırılması üçün möhkəm zəmin yaradır.
Hazırda qarşıda duran əsas vəzifə iki ölkənin real potesialını əks etdirməyən ticarət dövriyyəsini dəfələrlə artırmaq, biznes subyektləri arasında birbaşa təmasları təşviq etmək və qarşılıqlı investisiya layihələrini reallaşdırmaqdır. Bu baxımdan Bakıda təşkil olunan Laos–Azərbaycan biznes-forumu ikiölkəli iqtisadi platformanın qurulmasında strateji addım oldu. Forum çərçivəsində ticarət həcminin genişləndirilməsi, birgə biznes şurasının və ya işçi qrupunun yaradılması təklifləri praktiki əməkdaşlığa keçidin göstəricisidir. Kənd təsərrüfatı sahəsində imzalanmış Anlaşma Memorandumu, xidməti pasport sahiblərinin vizadan azad edilməsi haqqında saziş, eləcə də energetika, nəqliyyat-logistika, təhsil və turizm sahələrindəki imkanlar tərəfdaşlığın institusional əsaslarını möhkəmləndirir. Eyni zamanda, sovet dövründən başlayan təhsil mübadiləsi və humanitar bağlar iki xalq arasında mənəvi körpü rolunu oynamaqdadır.
Mövzu ilə bağlı Crossmedia.az-a açıqlama verən Milli Məclisin deputatı Nigar Məmmədova bildirib ki, Cənub-Şərqi Asiya regionu ilə əlaqələrin dərinləşməsi Azərbaycanın xarici siyasətində xüsusi çəkiyə malikdir:
"Azərbaycanla Laos arasında münasibətlərin inkişafı Cənub-Şərqi Asiya istiqamətində xarici siyasət əlaqələrinin genişləndirilməsi baxımından mühüm əhəmiyyət daşıyır. 1995-ci il mayında qurulan diplomatik münasibətlər bu gün yeni əməkdaşlıq imkanları ilə inkişaf etdirilir. Laos Xalq Demokratik Respublikasının Prezidenti Thonqlun Sisulitin ölkəmizə ilk səfəri, Prezident İlham Əliyevlə keçirilən görüşdə də əlaqələrin gələcək perspektivləri bir daha bəyan olundu. Dövlət başçımız siyasi əlaqələrin uzun illər uğurla inkişaf etdiyini vurğulayaraq, iqtisadi əməkdaşlığın da bu səviyyəyə çatdırılmasının vacibliyini qeyd etdi.
Cənab Prezidentin də qeyd etdiyi kimi, mövcud ticarət dövriyyəsi iki ölkənin potensialını əks etdirmir. Ticarət əlaqələrinin genişləndirilməsi, biznes dairələri arasında birbaşa təmasların qurulması və konkret investisiya layihələrinin nəzərdən keçirilməsi qarşıda duran əsas prioritetlərdəndir. Bakıda keçirilən Laos–Azərbaycan biznes-forumu da yeni imkanlar baxımından xüsusi əhəmiyyət kəsb edir. İki ölkə arasında iqtisadi və ticarət əlaqələrinin inkişafı, investisiya imkanları və biznes əməkdaşlığının genişləndirilməsi məsələləri geniş müzakirə olundu. Biznes dairələri arasında əlaqələrin gücləndirilməsi məqsədilə birgə biznes şurasının və ya işçi qrupunun yaradılması təklif olundu.
Kənd təsərrüfatı, enerji, nəqliyyat-logistika, turizm və təhsil də əməkdaşlığın perspektivli sahələridir. Kənd təsərrüfatı sahəsində əməkdaşlıq haqqında memorandumun imzalanması münasibətlərin praktik müstəvidə möhkəmləndirilməsi baxımından əhəmiyyətlidir. Xidməti pasport sahiblərinin vizadan qarşılıqlı azad edilməsi haqqında saziş isə rəsmi əlaqələrin asanlaşdırılmasına xidmət edəcək.
İki ölkə arasında humanitar əlaqələr də xüsusi əhəmiyyət daşıyır. Sovet dövründə Azərbaycanda təhsil almış laoslu mütəxəssislərin ölkələrinin inkişafında iştirakı iki xalq arasında tarixi bağların formalaşmasına töhfə verib. Təhsil mübadiləsinin yenidən genişləndirilməsi, tələbələr üçün imkanların artırılması və mədəni əlaqələrin inkişafı bu ənənəni davam etdirəcək. Azərbaycanın Laosla münasibətləri beynəlxalq təşkilatlar çərçivəsində əməkdaşlıq baxımından da əhəmiyyətlidir. Hər iki ölkənin çoxtərəfli platformalarda təmasları siyasi dialoqun dərinləşməsinə şərait yaradır. Prezident İlham Əliyevin də bəyan etdiyi kimi, əsas məqsəd mövcud dostluq münasibətlərini daha fəal və səmərəli əməkdaşlıqla möhkəmləndirməkdir."
Zeynəb Həsən
18:45 15.10.2026
Oxunuş sayı: 84
