Gündəm

Beton maneələr, boş piştaxtalar, cavabsız suallar: Dərnəgül bazarında nə baş verir?

Dərnəgül bazarında sahibkarlar qeyri-müəyyənlik içindədir. Onlara bazarı tərk etməli olduqları bildirilir. Sahibkarların sözlərinə görə, bazara gəlib onlara buradan çıxmalı olduqlarını deyirlər və rəsmi olmayan bildiriş paylanılıb. Lakin bu tələbin hüquqi əsası, köçürülmənin şərtləri və gələcək fəaliyyətləri ilə bağlı aydın məlumat verilməyib. Başqa sözlə, sahibkarlardan mövcud yerlərini tərk etmək tələb olunur, amma bundan sonrakı taleləri ilə bağlı qeyri-müəyyənlik aradan qaldırılmır.

Bazarın bəzi hissələrində isə vəziyyət daha da mürəkkəbdir. Yollar daş yığınları və beton maneələrlə bağlanıb. Nəticədə həmin ərazilərdə hərəkət məhdudlaşır, alıcıların gediş-gəlişi çətinləşir. Sürücülərdən biri də yolun əvvəlcədən xəbərdarlıq edilmədən bağlandığını bildirir.

Ortaya haqlı suallar çıxır: Bu yollar hansı qərarla bağlanıb? Məqsəd nədir? Əgər ərazinin boşaldılması və sahibkarların köçürülməsi nəzərdə tutulursa, niyə bu prosesin qaydaları əvvəlcədən aydın şəkildə izah edilmir?

Ən diqqətçəkən məqamlardan biri də budur ki, bazarın bəzi hissələri fəaliyyətini davam etdirir, digər hissələrində isə ticarət faktiki olaraq iflic vəziyyətinə düşüb. Bağlanan ərazilərdə alıcı görünmür. Həsrətlə müştəri gözləyən sahibkarlar isə günün böyük hissəsini boş piştaxtaların arxasında keçirirlər. Ticarət üçün nəzərdə tutulan ərazi alıcısız qalır, sahibkarın qazancı isə sual altında olur.

Mikrofonumuza danışmaq istəməyən bir neçə sahibkar isə onlara üstüörtülü təzyiqlər göstərildiyini iddia edir. Bu şəxslər açıq danışmaqdan çəkinsələr də, səsləndirdikləri narahatlıqlar vəziyyətin yalnız köçürülmə məsələsindən ibarət olmadığını göstərir.

Burada söhbət təkcə bazarın boşaldılmasından getmir. Söhbət illərlə qurduğu ticarətlə dolanışığını təmin edən insanların gələcəyindən, onların mülkiyyət və sahibkarlıq maraqlarına münasibətdən gedir. Sahibkarın fəaliyyət göstərdiyi ərazi bağlanırsa, onun qarşısına sadəcə çıxmaq tələbi qoyulmamalıdır. Prosesin hüquqi əsası, köçürülmənin şərtləri və alternativ fəaliyyət imkanları da aydın olmalıdır.

Qanuni qərar varsa, onun məzmunu açıqlanmalı, sahibkarlara rəsmi məlumat verilməli, köçürülmənin mexanizmi izah edilməlidir. Əks halda, beton maneələrlə bağlanan yollar və cavabsız qalan suallar insanlarda təzyiq və məcburetmə təəssüratı yaradır.

Dərnəgül bazarında hazırda cavab gözləyən təkcə sahibkarlar deyil. Burada baş verənlərin hansı qərara əsaslandığını, yolların niyə bağlandığını və köçürülmənin necə həyata keçiriləcəyini bilmək istəyən hər kəs üçün aydınlıq lazımdır. Çünki sahibkardan bir məkanı tərk etməyi tələb etmək mümkündür, amma onun gələcəyini qeyri-müəyyənlik içində qoymaq problemin həlli deyil.