ABŞ Azərbaycanda polad və ferroərintilər istehsalını araşdırır
ABŞ və Azərbaycanın sənaye, enerji və ticarət sahəsində əməkdaşlığı çərçivəsində ABŞ-nin Bakıdakı səfirliyinin İqtisadi məsələlər üzrə komandası Sumqayıtda yerləşən “Baku Steel Company” şirkətinin boru istehsalı və ferroərintilər zavodlarını ziyarət edib.
Crossmedia.az səfirliyə istinadən xəbər verir ki, səfər zamanı nümayəndələr neft və qaz sənayesində istifadə üçün nəzərdə tutulan tikişsiz polad boruların istehsal prosesi ilə yaxından tanış olublar. Qeyd edilib ki, bu borular əsasən ABŞ-a ixrac olunur və Amerika enerji sənayesində - xüsusilə qazma, nəql və infrastruktur sahələrində istifadə edilir.
Komanda həmçinin ABŞ-dəki polad istehsalçılarına xammal kimi tədarük olunan ferroərintilər istehsalı ilə tanış olub. Bu müəssisələr Azərbaycanın qeyri-neft sənayesində yüksək əlavə dəyər yaradan və ixracyönümlü məhsullar istehsal edən aparıcı sənaye strukturları sırasındadır.
ABŞ səfirliyindən bildirilib ki, iki ölkə arasında sənaye əməkdaşlığı qarşılıqlı iqtisadi faydanın artırılması baxımından böyük əhəmiyyət daşıyır. “ABŞ, qarşılıqlı rifah və dayanıqlı iqtisadi inkişaf naminə Azərbaycanla ticarət və investisiya sahəsində əməkdaşlığını daha da genişləndirməyə maraqlıdır”, - deyə açıqlamada qeyd olunub.
Xatırladaq ki, “Baku Steel Company” MMC-nin Sumqayıt boruyayma zavodunun yenidənqurmadan sonra açılışı 2017-ci ildə olub. Yenidənqurmadan sonra zavodun illik istehsal gücü 90 min tondan 200 min tona çatdırılıb. Şirkət məhsullarını ABŞ-la yanaşı, Avropa, Yaxın Şərq və Mərkəzi Asiya bazarlarına da ixrac edir.
Sumqayıt Kimya Sənaye Parkının rezidenti olan “Baku Non Ferrous and Foundry Company” MMC-nin əlvan metallar və ferroərintilər zavodunun açılışı 2018-cü ildə olub. Zavodda İtaliya texnologiyası əsasında ildə 50 min ton ferrosilisium və 72 min ton ferrosilikomanqan istehsal edilir.
19:15 29.04.2025
Oxunuş sayı: 754
