Macarıstanın səfiri Avropanın enerji təhlükəsizliyinin təmin edilməsində Azərbaycanın rolunu qeyd edib
Azərbaycan Avropanın enerji təhlükəsizliyinin təmin edilməsində mühüm rol oynayır.
Crossmedia.az xəbər verir ki, bunu Macarıstanın Azərbaycandakı səfiri Tomaş Torma ADA Universitetində keçirilən "Daha "yaşıl gələcəy"ə innovativ yollar: bərpa olunan enerji və emissiyaların azaldılması" adlı tədbirdə deyib.
"Biz Azərbaycana təkcə Mərkəzi Avropanın deyil, bütövlükdə bütün Avropanın enerji təhlükəsizliyinin təmin edilməsində mühüm rol oynayan ölkə kimi baxırıq. Ona görə də biz təkcə neft və təbii qaz sahəsində deyil, həm də Gürcüstan, Rumıniya və Bolqarıstanla birlikdə Avropada “yaşıl” enerji üzrə ən böyük sazişi – “yaşıl” enerji dəhlizini işləyib hazırlayırıq", - o bildirib.
Onun sözlərinə görə, Macarıstanda bərpa olunan enerji mənbələrinin əsasını Aİ-nin iqlim mühafizəsi üzrə direktivləri təşkil edir ki, onun rolu bərpa olunan enerji mənbələrindən istifadənin genişləndirilməsi yolu ilə enerji müstəqilliyini artırmaqdır. Son illərdə həm yaşayış, həm də sənaye binalarında günəş panelləri qurğularının sayında əhəmiyyətli artım müşahidə olunub ki, bu da günəş enerjisini Avropanın yaşıl enerjisinin ən sürətlə inkişaf edən sektorlarından birinə çevirib.
Qeyd edək ki, bu gün Bakıda "Daha "yaşıl gələcəy"ə innovativ yollar: bərpa olunan enerji və emissiyaların azaldılması" mövzusunda tədbir start götürüb.
12:30 07.04.2025
Oxunuş sayı: 7222
