Komissar: "Aİ Azərbaycandan qaz tədarükünü artırmaqda maraqlıdır"
Avropa İttifaqı (Aİ) Azərbaycandan qaz idxalını genişləndirməkdə maraqlıdır.
Crossmedia.az xəbər verir ki, bu barədə Aİ-nin enerji və mənzil təsərrüfatı məsələləri üzrə komissarı Dan Yorgensen Bakıda keçirdiyi mətbuat konfransında bildirib.
“Biz Azərbaycana son illərdə idxal edə bildiyimiz qaza görə təşəkkür etməklə yanaşı, bu əməkdaşlığı davam etdirəcəyimizə də ümid edirik. Azərbaycan qazı həqiqətən də Rusiya qazından asılılığımızı azaltmaqda son dərəcə vacib idi. Üstəlik, biz onun genişləndirilməsində çox maraqlıyıq, çünki bu gün qazımızın 13 %-i hələ də Rusiyadan gəlir və məqsədimiz onun idxalını tamamilə dayandırmaqdır”, - o deyib.
Yorgensenin sözlərinə görə, “yaşıl keçid”in fəal təşviqinə və bərpa olunan enerji mənbələrinin inkişafına baxmayaraq, qaz hələ bir müddət də Aİ-nin enerji balansının bir hissəsi olaraq qalacaq.
“Əminəm ki, Azərbaycan tədarük həcmini artıra bilsə, Avropa onlara yüksək maraq göstərəcək. Səfərimin səbəblərindən biri bunun mümkünlüyü üçün nə edə biləcəyimizi müzakirə etməkdir. Bu, əlbəttə ki, Avropa Komissiyası ilə Azərbaycan hökuməti, eləcə də ayrı-ayrı üzv dövlətlər, qaz şirkətləri, ötürücü sistem operatorları və digər maraqlı tərəflər arasında gələcək müzakirələrin mövzusudur”, - komissar əlavə edib.
20:06 04.04.2025
Oxunuş sayı: 721
