İran və ABŞ arasında gərginlik artır: “Həqiqət anı” yaxınlaşır?
Siyasi analitiklərə görə, ABŞ-nin İrana qarşı son təzyiqləri və husilərə hücumları, Tramp administrasiyasının nüvə proqramı ilə bağlı qəti qərarlar verməzdən əvvəl İrana göndərilən son mesaj ola bilər. Bu vəziyyət 2000-ci illərdə ABŞ ilə Liviya arasında baş verən hadisələri xatırladır. O dövrdə Müəmmər Qəddafi ABŞ-nin tələblərini qəbul edərək kütləvi qırğın silahlarını təslim etmişdi. Lakin İranın siyasi və hərbi gücü, eləcə də qərarvermə tərzi Liviyadan fərqlidir.
Crossmedia.az ABŞ mətbuatına istinadən məlumat verir ki, Trampın Ağ Evə qayıtması ilə İran üçün “həqiqət anı”nın yaxınlaşacağı ehtimal edilir. İran uzun illərdir ABŞ ilə birbaşa münaqişədən yayınaraq, regionda öz müvəkkilləri vasitəsilə Amerika təsirini zəiflətməyə çalışıb. Lakin Suriyadakı rolunun azalması və Türkiyənin artan nüfuzu Tehran üçün yeni çətinliklər yaradır.
Analitiklər hesab edir ki, əgər İran lideri Ayətullah Xamneyi nüvə məsələsində müsbət addımlar atmazsa və müqavimət siyasətini davam etdirsə, illərdir gözlənilən “həlledici an” yaxınlaşa bilər.
18:04 22.03.2025
Oxunuş sayı: 10089
