Rusiyanın Perm şəhərində 7 avtobus yandı, yeniyetmə saxlanıldı
Rusiyanın Perm şəhərində yeddi qaz mühərrikli avtobus yanıb, hadisəni törətməkdə şübhəli bilinən yeniyetmə saxlanılıb.
Crossmedia.az xəbər verir ki, “59.RU” bu barədə avtobus parkının sahibi İqor Sasunova istinadən məlumat yayıb.
Hadisə oktyabrın 21-də günorta saatlarında Prichalnaya küçəsində baş verib. Yanan “LiAZ” markalı avtobuslar keçmiş daşıyıcı “RT-Line” şirkətinə məxsus olub və 2025-ci ilin ortalarından şəhər marşrutlarına buraxılmayıb.
Yanğınla bağlı Fövqəladə Hallar Nazirliyinə saat 15:53-də məlumat daxil olub. Hadisə yerinə 29 xilasedici və 10 texnika cəlb edilib. Alov təxminən 200 kvadratmetr ərazini əhatə edib. Yanğın saat 16:17-də lokallaşdırılıb, 16:27-də isə tam söndürülüb.
Məlumata görə, yanan avtobusların yaxınlığında daha dörd salamat avtobus qalıb. Həmin nəqliyyat vasitələrinin plombu sökülüb, bəzilərindən isə ilk tibbi yardım çantaları götürülüb. Hadisə yerində olan müxbir avtobusların ətrafında məktəblilərin ola biləcəyini ehtimal edib.
Hadisə nəticəsində xəsarət alan olmayıb. İlkin məlumata görə, yanğına səbəb qəsdən yandırılma ola bilər. Perm diyarı üzrə Daxili İşlər Nazirliyinin idarəsi əsas şübhəlinin yeniyetmə olduğunu və onun saxlanıldığını təsdiqləyib. Hazırda hadisə ilə bağlı araşdırma aparılır, baş verənlərin digər təfərrüatları müəyyənləşdirilir.
22:04 21.10.2026
Oxunuş sayı: 50
