Azərbaycanlı tələbələr Türkiyədə aerokosmik innovasiyalar üzrə təcrübə mübadiləsinə başlayıblar
Azərbaycan universitetlərinin tələbələrinin kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində təcrübə mübadiləsi ilə bağlı Türkiyəyə səfəri ilə bağlı layihənin açılış mərasimi keçirilib. Azərbaycan Kosmik Agentliyinin (“Azərkosmos”) nəzdində fəaliyyət göstərən KOSMİK Akademiyanın təşkilatçılığı və Türkiyənin Gökmen Aerokosmik və Aviasiya Mərkəzinin (GUHEM-Gökmen Uzay ve Havacılık Merkezi) dəstəyi, eləcə də Azərbaycan Təhsil Nazirliyi, Elm və Ali Təhsil üzrə Dövlət Agentliyi və SABAH qruplarının əməkdaşlığı ilə ərsəyə gələn layihənin açılış mərasimi Türkiyənin Bursa şəhərində baş tutub.
Tədbirdə KOSMİK Akademiyanın rəhbəri İmran Muxtarov, ölkəmizin İstanbuldakı Baş konsulluğunun vitse-konsulu Murad Balacayev, GUHEM-in baş direktoru Halit Mirahmetoğlu, SABAH qrupları İcra Komitəsinin rəhbəri, Elm və Ali Təhsil üzrə Dövlət Agentliyinin sektor müdiri Elza Səmədova, “Azərkosmos”un insan resurslarının idarə edilməsi və sənədləşmə departamentinin direktoru İnarə İbrahimxəlilova, GUHEM-in İdarə Heyətinin sədri İbrahim Burkay və digərləri iştirak ediblər.
Mərasimdə çıxış edənlər bildiriblər ki, layihənin əsas məqsədi Azərbaycanda gənclərin kosmos, aerokosmos, süni intellekt və aviasiya istiqamətləri də daxil olmaqla, digər texnoloji sahələrdə nəzəri və praktiki biliklərini artırmaq, həmçinin beynəlxalq təcrübə mübadiləsini keçirərək, onların sözügedən sahələrdə gələcəyin güclü mütəxəssisləri kimi inkişaf etmələrinə dəstək olmaq, bununla da Azərbaycanda peşəkar kadrların və insan kapitalının inkişafına dəstək göstərmək, ölkəmizin regional və qlobal miqyasda sahə üzrə inkişafına dəstək verməkdir.
Milli Aviasiya Akademiyasının sektor müdiri Rabil Mürsəlov akademiyanın fəaliyyəti ilə bağlı məlumat verib.
Sonra heyətimiz ilə görüşən Türkiyənin ilk astronavtı Alper Gezeravcı geniş auditoriyaya sahə ilə bağlı mühazirə ilə çıxış edib.
Açılışdan sonra tələbələrimiz və gənc alimlərimizin mərkəzin aviasiya və astronavt proqramı ilə təcrübə mübadilələri başlayıb.
Səfər sabahdan etibarən praktik tədbirlərlə davam etdiriləcək ki, bunlara da simulyatorlar və simulyasiya əsaslı kritik hallarda yanaşmalar da daxildir.
Xatırladaq ki, təcrübə mübadiləsinə ölkəmizin 14 universitetini təmsil edən tələbə, gənc alimlər daxildir. “Azərkosmos” və “Zəfər” təşkilatının əməkdaşlığı ilə layihəyə üç şəhid və qazi övladı da cəlb edilib.
Martın 19-dək davam edəcək səfər çərçivəsində tələbələr, Bursadan sonra Ankaradakı Türkiyə Aerokosmik Agentliyi, TürkSat şirkəti, Müdafiə Texnologiyaları, Mühəndislik və Ticarət (STM) şirkəti, HAVELSAN, Türkiyə Elmi və Texnoloji Araşdırmalar Qurumu (TUBİTAK), PLAN-S Peyk və Aerokosmik Texnologiyalar mərkəzi, Orta Doğu Texniki Universiteti, İstanbulda isə Türkiyənin müdafiə sənayesi liderlərindən “Baykar” şirkəti, Türk Aerokosmik Sənayesi -TUSAŞ, İstanbul Texnopark, Bilişim Vadisi - Texnologiya İnkişaf Zonası kimi sahə üzrə bir sıra mərkəzlərində nəzəri və praktiki təcrübə mübadiləsi keçəcəklər.
08:36 16.03.2025
Oxunuş sayı: 1729
