Aİ Rusiyaya qarşı yeni sanksiya siyahılarını təsdiqləyəcək
Avropa İttifaqı ölkələrinin xarici işlər nazirləri Rusiyaya qarşı yeni sanksiya siyahılarını təsdiqləməyi planlaşdırırlar. Siyahıya banklar, Rusiya neftinin alıcıları və “kölgə donanması”na dəstək verməkdə şübhəli bilinən şirkətlər daxil ediləcək.
Crossmedia.az xəbər verir ki, bu barədə Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas “X” sosial şəbəkəsində məlumat verib.
Məlumata görə, sözügedən siyahılar yeni sanksiya paketi deyil, aralıq xarakter daşıyır. Aİ ölkələrinin daimi nümayəndələri bu siyahıları noyabrın 11-də razılaşdırıblar. Sanksiyalar ümumilikdə 145 fiziki və hüquqi şəxsi, o cümlədən Rusiyanın 50 bankını əhatə edir.
Mənbələrin məlumatına əsasən, Rusiyaya qarşı 22-ci sanksiya paketinin noyabrın sonunadək hazırlanması gözlənilir.
Kaya Kallas bildirib ki, noyabrın 13-də Aralıq dənizində Aİ-nin IRINI əməliyyatı çərçivəsində fəaliyyət göstərən qüvvələr MV MIDAG tankerinə baxış keçiriblər. Həmin gəminin sanksiyalara məruz qalan Rusiya neft məhsullarını daşıdığı ehtimal edilib.
Yoxlama zamanı gəminin saxta bayraq altında üzdüyü bildirilib.
Kallas qeyd edib ki, Avropa İttifaqı Rusiyanın “kölgə donanması”nın fəaliyyətinə həm dənizdə, həm də diplomatik vasitələrlə mane olmağa davam edəcək.
Qeyd edək ki, IRINI əməliyyatı 2020-ci ilin martında BMT-nin Liviyaya silah embarqosuna riayət olunmasına nəzarət məqsədilə başladılıb. Oktyabr ayında əməliyyatın mandatı 2029-cu il martın 31-dək uzadılıb. Yeni vəzifələr sırasına Aralıq dənizində Aİ-nin maraqlarının qorunması və Rusiya neftini daşıyan tankerlərə qarşı mübarizə də daxil edilib.
17:39 15.11.2026
Oxunuş sayı: 218